რუსეთის პრეზიდენტის პრესმდივანი  აცხადებს, რომ მოსკოვი აშშ-ის მიერ ახალი სანქციების დაწესებას ადეკვატურ პასუხს გასცემს.

“ჯერ ვერ ვიტყვი, როგორი იქნება პასუხი, თუმცა, როგორც ვიცით, აქ აბსოლუტურად უალტერნატივოდ მოქმედებს სამაგიეროს პრინციპი. რა თქა უნდა, გაცემული იქნება ადეკვატური პასუხი”, - განაცხადა კრემლის პრესმდივანმა.

ამავე დროს, პესკოვმა აღნიშნა, რომ რუსეთის საპასუხო ზომები ამერიკულ მხარეს ამავე სფეროში დისკომფორტს შეუქმნის.

დიმიტრი პესკოვი ასევე მიიჩნევს, რომ ბარაკ ობამას ადმინისტრაცია თავისი ქმედებებით ცდილობს საერთაშორისო ასპარეზზე ახალარჩეული პრეზიდენტის დონალდ ტრამპის პოზიციები შეარყიოს.

თავის მხრივ, რუსეთის საგარეო საქმეთა სამინისტროს წარმომადგენელმა მარია ზახაროვამ ბარაკ ობამას ადმინისტრაციას “გაბოროტებულ და ახლომხედველ წარუმატებელ პირთა ჯგუფი” უწოდა.

თეთრმა სახლმა რუსეთის წინააღმდეგ ახალი სანქციების დაწესების შესახებ განაცხადა და ვაშინგტონიდან და სან-ფრანცისკოდან 35 რუს დიპლომატს აძევებს. როგორც თეთრი სახლის განცხადებაშია ნათქვამი, ახალი სანქციები უკავშირდება წინასაარჩევნო კამპანიის დროს განხორციელებულ კიბერთავდასხმებს, რომლებშიც ვაშინგტონი რუსეთს ადანაშაულებს.

ამას გარდა, აშშ-ის ხელისუფლება დაკეტავს მერილენდსა და ნიუ-იორკში რუსეთის ყველა დიპლომატიურ მისიას, რომელიც, ვაშინგტონის აზრით, სადაზვერვო მიზნებისთვის გამოიყენებოდა. “პერსონა ნონ გრატად” გამოცხადებულმა რუსმა დიპლომატებმა აშშ-ის ტერიტორია 72 საათის განმავლობაში უნდა დატოვონ.

აშშ-ის ფინანსთა სამინისტროს ვებგვერდზე გამოქვეყნებული სანქციები ექვს პირსა და ხუთ უწყებას ეხება, მათ შორის რუსეთის უშიშროების ფედერალურ სამსახურს.