საუდის არაბეთის პოლიციამ ახალგაზრდა ქალი იმის გამო დააკავა, რომ ის მუსლიმური სამოსის - აბაიას გარეშე ელ-რიადის ცენტრალურ ქუჩაზე გამოჩნდა. ამის შესახებ გამოცემა Arabian Business-ი წერს.

აბაია გრძელი ტრადიციული ქალის სამოსია, რომელიც საზოგადოებრივ ადგილებში ჩასაცმელად არის განკუთვნილი.

საუდის არაბეთში ადგილობრივი ქალები და უცხოელები ვალდებულნი არიან მკაცრად დაიცვან აბაიას ტარების წესები საზოგადოებრივი თავშეყრის ადგილებში.

ქალი რელიგიური პოლიციიდან შესული საჩივრის შემდეგ დააკავეს.

მედიის ცნობით, პოლიციელებმა დააკავეს  გოგონა, რომელმაც ”აბაია გაიხადა ქალაქის ერთ-ერთ მთავარ ქუჩაზე და ამით განახორციელა განზრახვა, რომლის შესახებ რამდენიმე დღით ადრე სოციალურ ქსელში წერდა.”

გოგონამ Twitter-ში დაწერა, რომ საზოგადოებრივ ადგილებში აბაიას გარეშე გამოჩნდებოდა.

ადგილობრივმა მედიამ გამოაქვეყნა ქალის ფოტო, სადაც მას  შავი პიჯაკი ჭრელი კაბის ზემოდან აცვია. სხეულის ღია ადგილები ფოტოზე რეტუშირებულია.