,,ქართული ოცნებისა“ და ,,პატრიოტთა ალიანსის“ ერთობა ძალიან მძიმე რეალობაა ჩვენი ქვეყნისთვის, - განაცხადა ,,ნაციონალური მოძრაობის“ დეპუტატმა გიგა ბოკერიამ თავდაცვის და უშიშროების კომიტეტის თავმჯდომარის მოადგილის არჩევისას ხმების გაყოფასტან დაკავშირებით.

,,ამ ხალხს სულიერი პოლიტიკური ერთობა აქვს. პატრიოტთა ალიანსის წევრები ბიძინა ივანიშვილის სატელიტები არიან. ამ ხალხს ძალიან ბევრი გადაკვეთა აქვს, ეს ძალიან მძიმე რეალობაა ჩვენი ქვეყნისთვის. თან, ზოგჯერ რცხვენიათ ამის გარკვევით თქმა, რადგან იციან საზოგადოებრივი აზრი ღიად პრორუსული და ღიად სიძულვილის მქადაგებელი ჯგუფების მიმართ. ამ ჭმუნვაში არიან, მაგრამ ეს ძალიან სამარცხვინო და მძიმე რეალობაა ჩვენი ქვეყნისთვის», - აღნიშნა ბოკერიამ.

პარლამენტის თავდაცვის და უშიშროების კომიტეტმა დღეს კენჭი თავმჯდომარის მოადგილის კანდიდატურებს უყარა, თუმცა ხმები გაიყო. ირაკლი აბესაძემ 9-ის ნაცვლად 8, ემზარ კვიციანმა კი 5 ხმა მიიღო. კომიტეტის სხდომა ირაკლი სესიაშვილმა დეპუტატებისადმი მიმართვით დაიწყო და უმრავლესობის წევრებს მოუწოდა მხარდაჭერა ირაკლი აბესაძისთვის გამოეცხადებინათ.