”ისლამური სახელმწიფოს” მებრძოლებმა 300-ზე მეტი ყოფილი ერაყელი პოლიციელი სიკვდილით დასაჯეს და მოსულთან ახლოს დამარხეს. ამის შესახებ ინფორმაციას საერთაშორისო უფლებადამცველი ორგანიზაცია Human Rights Watch-ი ავრცელებს.

მასობრივი სამარხი ქალაქ ჰამამ ელ-ალილში მდებარეობს. უფლებადამცველების თქმით, პოლიციელები დახვრიტეს ან  თავები მოკვეთეს.

საძმო საფლავი გასულ კვირას იპოვნეს. თვითმხილველების თქმით, ისლამისტებმა ადრე გადაცევბული ყოფილი პოლიციელები დახოცეს. 50 მეტრის სიგანისა და 100 მეტრის სიგრძის სამარხი მოსულიდან 30 კმ-ის დაშორებით მდებარეობს.

მანამდე გავრცელებული ინფორმაციით, ”ისლამური სახელმწიფოს” მებრძოლებმა  ერაყის უსაფრთხოების ძალების 295 ყოფილი თანამშრომელი გაიტაცეს და 1500 ოჯახი ქალაქ ჰამამ ელ-ალილიდან მოსულში იძულებით წაიყვანეს.

მოსულის გათავაისუფლების ოპერაცია ერთი თვეა მიმდინარეობს. მასში ჩართულია ერაყის არმია, ქურთების ”პეშმერგას” შენაერთები და საერთაშორისო კოალიცია აშშ-ის მეთაურობით.