გამოძიების ფედერალური ბიურო აშშ-ის პრეზიდენტობის კანდიდატის ჰილარი კლინტონის იმეილების საქმესთან დაკავშირებით გამოძიებას არ განაახლებს. FBI-ის ხელმძღვანელმა ჯეიმს კომმა კონგრესს აცნობა, რომ  კლინტონის ახალი წერილების შესწავლის შემდეგ მას ბრალს არ წაუყენებენ.   

”შევისწავლეთ ჰილარი კლინტონის ყველა გაგზავნილი და მიღებული წერილი მისი სახელმწიფო მდივნად მუშაობის პერიოდში. ჩვენი შესწავლის საფუძველზე არ შეგვიცვლია დასკვნები, რომლებიც სახელმწიფო მდივნის კლინტონის მიმართ ივლისში გავაკეთეთ”, - ნათქვამია კონგრესის სახელზე გაგზავნილ წერილში.

დონალდ ტრამპმა თავის მხრივ ამომრჩევლებთან  მინესოტაში გამართულ შეხვედრაზე გამოძიების გაგრძელების და კლინტონის პასუხისგებაში მიცემის პირობა დადო.

კლინტონის ელექტრონულ მიმოწერსათან დაკავშირებით სკანდალი 2015 წლის მარტში აგორდა.