რომის პაპის საქართველოში ვიზიტის საწინააღმდეგოდ თბილისის საერთაშორისო აეროპორტთან აქცია გაიმართა

აქციის მონაწილეების განცხადებით, ისინი პაპის საქართველოში ჩამოსვლას აპროტესტებენ, რადგან პაპი „სამოციქულო მისიით“ ჩამოდის საქართველოში. მათი თქმით, პაპის ვიზიტი მართლმადიდებლებისთვის მიუღებელია.

”ვაპროტესტებთ იმიტომ, რომ პაპი ჩამოდის სულიერი, სამოციქულო მისიით იმისათვის, რომ იქადაგოს რაც ჩვენთვის, მართლმადიდებლებისთვის მიუღებელია. ეწევა პროზელიტურ საქმიანობას, ატარებს მესას სტადიონზე, უნდა შესვლა სვეტიცხოველში”, - განაცხადა დეკანოზმა, დავით ისაკაძემ. 

როგორც ისაკაძემ აღნიშნა, პაპი შეეცდება, რომ ეკლესიურად გაუნათლებელი მართლმადიდებელი ადამიანები გადაიბიროს და სწორედ ასეთი ადამიანების გადაბირება რომ არ მოხდეს, ამიტომ აქციაზე შეკრებილი მონაწილეები პაპის ვიზიტს საქართველოში აპროტესტებენ. 

რომის პაპის, ფრანცისკე პირველის ვიზიტი უკვე დაიწყო.

ფრანცისკე პირველს თბილისის საერთაშორისო აეროპორტში საქართველოს კათოლიკოს-პატრიარქი, უსმინდესი და უნეტარესი ილია მეორე, საქართველოს პარლამენტის თავმჯდომარე დავით უსუფაშვილი, საქართველოს პრეზიდენტი გიორგი მარგველაშვილი მეუღლესთან ერთად, დედდაქალაქის მერი დავით ნარმანია, კათოლიკური კონფესიის წარმომადგენლები დახვდნენ.