საქართველოში თავდაცვის ინსტიტუციური აღმშენებლობის სკოლა გაიხსნა

დღეს თბილისში თავდაცვის ინსტიტუციური აღმშენებლობის სკოლა (DIB) გაიხსნა. სკოლა ოფიციალურად საქართველოს პრეზიდენტმა გიორგი მარგველაშვილმა, საქართველოს თავდაცვის მინისტრმა თინათინ ხიდაშელმა და სახალხო დიპლომატიის საკითხებში ნატოს გენერალური მდივნის თანაშემწემ თაკიმ ილდემმა გახსნეს.

საზეიმო ცერემონიალზე მოწვეულ სტუმრებს საქართველოს პრეზიდენტმა სიტყვით მიმართა. გიორგი მარგველაშვილის განცხადებით, თავდაცვის ინსტიტუციური აღმშენებლობის სკოლა კიდევ ერთი მნიშვნელოვანი ინსტიტუციაა, რომელიც პროფესიული კადრების მომზადების თვალსაზრისით ჩვენს ქვეყანას გადაადგმევინებს ნაბიჯს უფრო სტაბილური, მტკიცე და დაცული რეგიონის შესაქმნელად.

„საქართველო მართლაც ურთულეს და ამავე დროს უმნიშვნელოვანეს რეგიონში სულ უფრო მტკიცედ ანვითარებს თავის სახელმწიფოებრიობას და თავდაცვისუნარიანობას. ჩვენი ქვეყანა რეალურად ურთულესი გამოწვევების წინაშე დგას, მაგრამ, ამავე დროს, გვაქვს უდიდესი შესაძლებლობები. სულ უფრო მეტი ქვეყანა, როგორც ევროპაში ასევე აზიაში, ხედავს ჩვენი რეგიონის მნიშვნელობას… ჩვენ არაერთხელ განგვიცხადებია, რომ სტაბილურობას ნატოში ინტეგრაციაში ვხედავთ. ჩვენ არაერთი მტკიცე ნაბიჯი გადაგვიდგამს ამ მიმართულებით. დღეს როდესაც ჩვენ ვლაპარაკობთ ამ მნიშვნელოვანი ახალი ინსტიტუტის შექმნაზე, ეს არის ის წარმატება, რომელიც 2014 წელს უელსიდან წამოვიღეთ. მაგრამ ის წარმატება, თავის მხრივ, მიღწეული იყო არა ერთი ქართველი სამხედრო მოსამსახურის გმირული შრომის და გმირული მოღვაწეობის შედეგად“, - განაცხადა გიორგი მარგველაშვილმა.

თინათინ ხიდაშელის განცხადებით, თავდაცვის ინსტიტუციური აღმშენებლობის სკოლის გახსნა არის ერთ-ერთი უმნიშვნელოვანესი და ფართოდ გადადგმული ნაბიჯი ნატო-საქართველოს ურთიერთობებში.

„ამ სკოლის მთავარი დევიზი ბანერზე წერია: „კომპეტენცია, გამჭვირვალობა, უსაფრთხოება, ერთიანობა“. ეს არის ის მთავარი ამოცანები, რომელსაც თავდაცვის ინსტიტუციური აღმშენებლობის სკოლა უნდა ემსახუროს. ეს არის პრინციპები, რომელსაც სკოლა დაეფუძნება. ეს არის პრინციპები, რომლის მიმდევარი იქნება მისი ყოველი მსმენელი, პროფესორი და მასწავლებელი. თავდაცვის ინსტიტუციური აღმშენებლობის სკოლა არის პროექტი, რომელიც უელსის სამიტიდან წამოვიღეთ და ამ ერთი წლის განმავლობაში მინდა მადლობა გადავუხადო თავდაცვის სამინისტროს ყველა იმ თანამშრომელს, რომლებმაც ძალიან დიდი ძალისხმევა ჩადეს ამ სკოლის გახსნაში. ეს იყო საკმაოდ გრძელი და რთული გზა. ყველა არ იყო აღფრთოვანებული ამ იდეით მაგრამ ჩვენ მოვედით დღევანდელ დღემდე. ეს არის მხოლოდ პირველი ნაბიჯი, რომელსაც კიდევ უფრო დიდი წინააღმდეგობებით სავსე გზა აქვს გასავლელი. ძალიან დიდი იმედი გვაქვს, რომ სექტემბერში სკოლა უკვე მიიღებს პირველ მსმენელებს. თავდაცვის ინსტიტუციური აღმშენებლობის სკოლა არის ჩვენი ქვეყნის რეგიონული და საერთაშორისო მნიშვნელობის ზრდისთვის გადადგმული ძალიან დიდი ნაბიჯი. ეს არის მეტი პროფესიონალი თავდაცვის და უსაფრთხოების სფეროში, მიუხედავად იმისა, თუ სად და რა სეგმენტში მუშაობენ ესა თუ ის ადამიანები. ეს ნიშნავს მეტ გამჭვირვალობას და დიდი ეფექტისთვის ნაკლები რესურსის ხარჯვას. ბევრი მიმართულება, რომელიც აქამდე გაფანტული იყო სხვადასხვა პროგრამებში, ერთად იქნება თავმოყრილი, სწორედ, ამ სკოლაში. გამჭვირვალობის საუკეთესო მაგალითია თვითონ ის ადგილი, სადაც ჩვენ სკოლას ვხსნით. მინდა გითხრათ, რომ ეს იყო თავდაცვის სამინისტროს ერთ-ერთი საიდუმლო ობიექტი და ერთ-ერთი მინისტრი მას კერძო რეზიდენციად იყენებდა. სწორედ, ასეთი ადგილები გავხსენით ხელისუფლებაში მოსვლის შემდეგ საზოგადოებისთვის. ასეთ ადგილებში მივეცით თავისუფლება ადამიანებს და მთელი ეს ინფრასტრუქტურა ჩვენი ქვეყნის თავდაცვისუნარიანობის განმტკიცებას და სიძლიერეს მოხმარდება. ნატო-საქართველოს არსებითი პაკეტის ამ მნიშვნელოვანი პროექტის განხორციელებისთვის მინდა განსაკუთრებული მადლობა გადავუხადო ჩვენს გერმანელ პარტნიორებს. პირველ რიგში, ჩვენს კოლეგებს, რომლებმაც მიიღეს ეს გადაწყვეტილება იყვნენ ამ პროექტის ლიდერები, იყვნენ საქართველოს სახელმწიფოს გვერდში პროექტის განხორციელებაში და, შესაბამისად, სწორედ, გერმანელი ოფიცერი ხელმძღვანელობს პროექტს. ასევე, მინდა, მადლობა ვუთხრა სლოვაკებს და იმ ორ სახელმწიფოს, რომლებმაც სურვილი და მზადყოფნა გამოთქვეს ჩაერთონ პროექტის განვითარებაში. იტალია და ჰოლანდია ის ქვეყნები არიან, რომლებიც მალე შემოუერთდებიან პროექტს და ჩვენთან ერთად იზრუნებენ მისი წარმატებისთვის. რადგან პროექტი ნატო-საქართველოს პაკეტის ფარგლებში ხორციელდება, დახმარებას თავად ნატოს ინსტიტუციისგან ველოდებით და დღეს ამ გახსნაზე ნატოს გენერალური მდივნის თანაშემწის ჩვენთან ერთად ყოფნა ამისი საუკეთესო დასტურია“, - განაცხადა თინათინ ხიდაშელმა.

ღონისძიების ოფიციალური ნაწილის დასასრულს სკოლის მემორიალური დაფა გაიხსნა.

საზეიმო ცერემონიალს აღმასრულებელი და საკანონმდებლო ხელისუფლებისა და დიპლომატიური კორპუსის წარმომადგენლები დაესწრნენ.

თავდაცვის ინსტიტუციური აღმშენებლობის სკოლა ნატო-საქართველოს არსებითი პაკეტის ერთ-ერთი მნიშვნელოვანი პროექტია. სკოლის მთავარ ამოცანას უსაფრთხოების სექტორში კარგი მმართველობის მხარდაჭერა, თავდაცვისა და უსაფრთხოების საკითხებში ეროვნული შესაძლებლობების გაძლიერება, ნატოს შესაბამის სტრუქტურებთან, წევრ და პარტნიორ ქვეყნებთან თანამშრომლობის გაძლიერება წარმოადგენს. თავდაცვის ინსტიტუციური აღმშენებლობის სკოლა თავდაცვის სამინისტროს პროფესიული განვითარების ცენტრის ბაზაზე დაფუძნდა. პროექტის წარმატებით განხორციელების მიზნით, საქართველოში მოვლენილი პროექტის გერმანელი ხელმძღვანელი და სლოვაკი ექსპერტი მჭიდროდ თანამშრომლობენ ქართველ კოლეგებთან. მალე პროექტში ნატოს წევრი კიდევ ერთი ქვეყანა - იტალია ჩაერთვება.

საქართველოში დაარსებული თავდაცვის ინსტიტუციური აღმშენებლობის სკოლა ნატოსთან თავსებადი ერთ-ერთი სკოლა იქნება რეგიონში, რაც კიდევ უფრო გაზრდის საქართველოს მნიშვნელობას რეგიონულ და საერთაშორისო დონეზე.
სკოლა ითვალისწინებს პროფესიული განვითარების პროგრამებს როგორც თავდაცვისა და უსაფრთხოების სექტორის სამოქალაქო და მაღალი რანგის სამხედროებისთვის, ასევე აღნიშნულ სფეროში სამოქალაქო საზოგადოების წარმომადგენლებისთვის. სკოლის პროფესიული განვითარების პროგრამები ხელს შეუწყობს თავდაცვის ტრანსფორმაციასა და უსაფრთხოების სექტორის რეფორმებს, რაც შესაბამისად გააძლიერებს ქვეყნის დემოკრატიულ ინსტიტუტებს და დააჩქარებს საქართველოს ნატოში გაწევრიანების პროცესს. სკოლა ერთადერთი საგანმანათლებლო ცენტრი იქნება რეგიონში, რომელიც ნატოს წევრ და პარტნიორ ქვეყნებს სხვადასხვა ღონისძიებებს შესთავაზებს, რაც თავდაცვისა და უსაფრთხოების სფეროში გამოცდილების/ექსპერტიზის გაზიარებისა და თანამშრომლობის გაძლიერების განსაკუთრებული შესაძლებლობა იქნება. თავდაცვის ინსტიტუციური აღმშენებლობის სკოლა სამხედრო და სამოქალაქო პერსონალის გადამზადების პროცესში, ნატოს წევრი ქვეყნების სწავლების მეთოდოლოგიებსა და მიდგომებს გამოიყენებს. სემინარები, კონფერენციები და სხვადასხვა საგანმანათლებლო პროგრამები წარმატების, საუკეთესო ისტორიებისა და გამოცდილების ერთმანეთისთვის გაზიარების საუკეთესო შესაძლებლობა იქნება.