საქართველოს შეიარაღებული ძალების დაარსებიდან 25 წლის იუბილე

ვაზიანში, IV მექანიზირებული ბრიგადის ტერიტორიაზე შეიარაღებული ძალების დაარსებიდან 25 წლისადმი მიძღვნილი საზეიმო ღონისძიება გაიმართა. სამხედრო მოსამსახურეებს ქართული არმიის დღე საქართველოს სამხედრო ძალების უმაღლესმა მთავარსარდალმა, პრეზიდენტმა გიორგი მარგველაშვილმა, საქართველოს პარლამენტის თავმჯდომარემ დავით უსუფაშვილმა, თავდაცვის მინისტრმა თინათინ ხიდაშელმა, გენერალური შტაბის უფროსმა, გენერალ-მაიორმა ვახტანგ კაპანაძემ და შეიარაღებული ძალების სხვა წარმომადგენლებმა მიულოცეს.

საზეიმო ღონისძიებას დაესწრნენ ასევე, მთავრობის წევრები და დიპლომატიური კორპუსის წარმომადგენლები.

საქართველოს პრეზიდენტმა გიორგი მარგველაშვილმა საქართველოს შეიარაღებულ ძალებს 25 წლის იუბილე მიულოცა, მის მნიშვნელობაზე გაამახვილა ყურადღება და ქართველ სამხედროებს სამშობლოს სამსახურისთვის გადაუხადა მადლობა.

„ჩვენ გადავდგით მთავარი და სწორი ნაბიჯი - დავიწყეთ ძლიერი შეიარაღებული ძალების შექმნა... დღეს თქვენ აგრძელებთ იმ წინაპრების ბრძოლას, რომლებმაც ჩვენი ქვეყანა 21-ე საუკუნემდე მოიყვანეს. თქვენ დღეს ამას აკეთებთ ამაყად, ჩვენი ჯარების პროფესიონალიზმის, თქვენი კვალიფიკაციიდან გამომდინარე, არა მარტო საქართველოში, არამედ მსოფლიოს სხვადასხა წერტილში. თქვენ აძლიერებთ ჩვენი ქვეყნის იმიჯს, გლობალურ სტაბილურობას და წინ სწევთ ჩვენს ქვეყანას. ქართველი ხალხის სახელით, მინდა მადლობა გითხრათ ამ სამსახურისთვის. მინდა თავი დავხარო იმ მებრძოლების წინაშე, რომლებიც დღეს აქ არ დგანან, მაგრამ ბუნებრივია, მათი საქმე და მათი სულები აქ არიან, მომავლშიც იქნებიან და გააძლიერებენ ჩვენს სამშობლოს,“ - მიმართა საქართველოს პრეზიდენტმა სამხედრო მოსამსახურეებს.

საქართველოს პარლამენტის სახელით, შეიარაღებულ ძალებს იუბილე მიულოცა პარლამენტის თავმჯდომარემაც და აღნიშნა, რომ ეს არის დღე, როდესაც მთელი საქართველო ერთიანია. „25 წელი ეს არის საკმარისი იმისთვის, რომ ქართულმა სახელმწიფომ ამაყად განაცხადოს: დიახ, ჩვენ გვყავს შეიარაღებული ძალები, რომელსაც შეუძლია თავისი მისიის შესრულება,“ - განაცხადა დავით უსუფაშვილმა.

ქართულ ჯარს იუბილე მიულოცა საქართველოს თავდაცვის მინისტრმა. 
„მინდა მივულოცო მთელს საქართველოს ეს ძალიან მნიშვნელოვანი დღე. საქართველოს შეიარაღებული ძალები თანამედროვე ქართული სახელმწიფოს ხნის არის და ჩვენ ყველანი ერთად გავიზარდეთ - ჯარი, სამოქალაქო სექტორი და ქართული დამოუკიდებელი მედია. ეს არის სახელმწიფო, რომელიც, სწორედ, ჯარის სიძლიერეს ეფუძნება. ქართული სახელმწიფო ჯარის წარმატებაზეა დიდ წილად დამოკიდებული. ნებისმიერი ნაბიჯი, რომელიც წარმატებული იქნება შეიარაღებული ძალებისთვის, წარმატებულია მთელი ქვეყნისთვის. ყველა ერთად უნდა ვიდგეთ ამ წარმატების სამსახურში. ვემსახუროთ ჩვენს ქვეყანას და დავეხმაროთ საქართველოს შეიარაღებულ ძალებს, რომ მათი ყოველდღიურობა უფრო საინტერესო იყოს, უფრო ენთუზიაზმით სავსე, გამოწვევებით ნაკლები და მეტი შემართებით“, - აღნიშნა თინათინ ხიდაშელმა.

საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ შეიარაღებული ძალების დღე ქართველ ვეტერანებს და ახალგაზრდა კადეტებს მიულოცა: „სხვადასხვა სამხედრო მისიებში ჩვენ ვაჩვენეთ, თუ რას წარმოადგენს ქართველი ჯარისკაცი. ამ ბიჭებმა ავღანეთში ანახეს, თუ რას ნიშნავს პროფესიონალი სამხედრო და ვაჟკაცობა. ძალიან კმაყოფილი ვარ, რომ ეს პერიოდი და მანამდე რამოდენიმე წელი ამ ჯარისკაცების ხელმძღვანელობა მომიწია. უდიდესი სიამაყის გრძნობით ვარ აღვსილი, ვინაიდან მე ვარ ერთ-ერთი ამ სამხედროთაგანი“.

შეიარაღებული ძალების იუბილეზე ეროვნული გვარდიის სამხედრო-სასულე ორკესტრმა საქართველოს სახელმწიფო ჰიმნი შეასრულა. ღონისძიების მონაწილეებმა წუთიერი დუმილით პატივი მიაგეს საქართველოს ერთიანობისათვის ბრძოლისა და სამსახურეობრივი მოვალეობის შესრულების დროს დაღუპული სამხედრო მოსამსახურეების ხსოვნას.

საზეიმო ღონისძიების ფარგლებში საქართველოს თავდაცვის მინისტრის ბრძანებით, მორიგი სამხედრო წოდება ვადამდე მიენიჭა 10 სამხედრო მოსამსახურეს, რომელთა შორის ორი ქალბატონი იყო. რამდენიმე სამხედროს მედლები - „სამშობლოსათვის თავდადებული“, „საბრძოლო იარისათვის", „სიცოცხლის გადარჩენისათვის“ და „სამშვიდობო ოპერაციებში მონაწილეობისათვის“ გადაეცა, ხოლო, თავდაცვის უწყების 11 წარმომადგენელი სამსახურებრივ-საშტატო იარაღით დაჯილდოვდა.

საქართველოს შეიარაღებული ძალების დაარსებიდან 25 წელი 30 აპრილს შესრულდა. სააღდგომო დღესასწაულების გათვალისწინებით, წელს საიუბილეო თარიღი საზეიმო ღონისძიებით დღეს აღინიშნა.

1990 წლის დეკემბერში საქართველოს რესპუბლიკის უზენაესი საბჭოს დადგენილებით, საქართველოს შინაგან საქმეთა სამინისტროსთან შინაგანი ჯარები - ეროვნული გვარდია შეიქმნა. ქართული არმია, სწორედ, ეროვნული გვარდიის საფუძველზე განვითარდა. 1991 წლის 24 აპრილს საქართველოს მინისტრთა კაბინეტმა განკარგულება გამოსცა, რომელიც წვევამდელთა სავალდებულო სამხედრო სამსახურში გაწვევას ეხებოდა. 30 აპრილს არმიაში გაწვევა ოფიციალურად დაიწყო, სწორედ, ეს თარიღი განისაზღვრა ქართული ჯარის დაარსების დღედ.