რუსულ დრონთან დაკავშირებული ინციდენტი ნატო-ს ხელშეკრულების მე-4 მუხლის გააქტიურების საფუძველს იძლევა - რუმინეთის საგარეო უწყება

რუმინეთის საგარეო საქმეთა მინისტრი ოანა ცოიუმ განაცხადა, რომ გალატში საცხოვრებელ სახლზე რუსული დრონის ჩამოვარდნა წარმოადგენს საფუძველს ნატო-ს ხელშეკრულების მე-4 მუხლის კონსულტაციების ამოქმედებისთვის.

მინისტრის თქმით, ასეთი ინციდენტები მიეკუთვნება იმ კატეგორიას, რომლებიც ალიანსის წევრებს შორის კონსულტაციების დაწყებას ამართლებს, როდესაც ერთ-ერთი ქვეყანა საკუთარი უსაფრთხოების საფრთხეს ხედავს.

მისივე განმარტებით, მე-4 მუხლის გამოყენება საერთო გადაწყვეტილებაა და ის არის ერთ-ერთი ინსტრუმენტი, რომლითაც რუმინეთს შეუძლია ისარგებლოს.

მინისტრმა ასევე აღნიშნა, რომ ინციდენტთან დაკავშირებით მიმდინარეობს კონსულტაციები ქვეყნის პრეზიდენტთან, პრემიერ-მინისტრთან და მოკავშირეებთან, ხოლო რუმინეთის პრეზიდენტი ნიკუშორ დანი დღის განმავლობაში გააკეთებს შესაბამის განცხადებას.

კითხვაზე, მოიწვევენ თუ არა ეროვნული უშიშროების საბჭოს სხდომას და განიხილა თუ არა მან ეს საკითხი პრეზიდენტ ნიკუშორ დანთან, მინისტრმა უპასუხა, რომ განხილვები მიმდინარეობს.

„პრეზიდენტმა დღეს უნდა გააკეთოს საჭირო განცხადებები. პრეზიდენტის პრეროგატივაა, მოიწვიოს ეროვნული უშიშროების საბჭო და შესაბამისად, აცნობოს ფართო საზოგადოებას ამის შესახებ. როგორც თავდაცვის მინისტრი, ასევე მე მუდმივ კონტაქტზე ვართ პრეზიდენტთან, პრემიერ-მინისტრთან და ჩვენს მოკავშირეებთან. ინფორმაცია მიიღო ნატ-ოს გენერალურმა მდივანმაც“, - აღნიშნა მინისტრმა.

ცნობისთვის, ჩრდილოატლანტიკური ხელშეკრულების მე-4 მუხლი ნატო-ს წევრ სახელმწიფოებს ავალდებულებს, ერთად გაიარონ კონსულტაციები, როდესაც რომელიმე მათგანის აზრით, მოკავშირე ქვეყნის ტერიტორიული მთლიანობა, პოლიტიკური დამოუკიდებლობა ან უსაფრთხოება საფრთხის ქვეშაა.