უკრაინა საქართველოს "ბუკების" და "ჯაველინების" გადაცემას სთხოვდა - ანდრეი კასიანოვი

უკრაინის საქმეთა დროებითი რწმუნებული, ანდრეი კასიანოვი ამბობს, რომ კიევმა თბილსს სთხოვა "ბუკის" სარაკეტო კომპლექსების გადაცემა, რომლებიც საქართველოს გადასცა 2008 წლის ომის დროს და ასევე, აშშ-ის მიერ საქართველოსთვის მიწოდებულ ტანკსაწინააღმდეგო კომპლექსებს "ჯაველინი". უკრაინელი დიპლომატის თანახმად, აშშ თანახმა იყო, რომ საქართველოს "ჯაველინები" უკრაინისთვის გადაეცა ახალი კომპლექსების სანაცვლოდ.

ამის შესახებ კასიანოვი „უკრაინსკა პრავდაში" გამოქვეყნებულ სტატიაში საუბრობს.

კასიანოვის განცხადებით, მიუხედავად იმისა, რომ საქართველოს მთავრობამ სამხედრო დახმარების გაწევაზე კატეგორიული უარი თქვა, უკრაინა ეწინააღმდეგება ამ საკითხის გამოყენებას შიდა პოლიტიკური დავებისთვის და უარყოფს ნებისმიერ ბრალდებას რუსეთთან ომში საქართველოს ჩათრევის მცდელობების შესახებ.

ამასთან, კასიანოვი ამბობს, რომ საქართველოს სამთავრობო და არსამთავრობო სექტორის მხრიდან დიდი მხარდაჭერის მიუხედავად, უკრაინის მოქალაქეთა უმრავლესობა საქართველოს ტერიტორიას იყენებს სხვა ქვეყნებში, ძირითადად, ევროპაში ტრანზიტისთვის. კასიანოვი მიზეზად ასახელებს საქართველოში რუსეთის მოქალაქეთა „ანომალიურად დიდ ყოფნას“, მათ შორის პუტინის და უკრაინელების გენოციდის პოლიტიკის აქტიური მხარდამჭერების.