აბსოლუტურად სხვა გარემოებებია ჰააგის პროკურორის გადაწყვეტილებიდან გამომდინარე და დღეს ხელისუფლება არაფერს აკეთებს, რომ ამაზე განსაკუთრებული აქცენტი იყოს, ათი წლის მანძილზე ეს ხალხი გვიმტკიცებდა, რომ ომი დაიწყო საქართველომ - ვაშაძე

დროა, სტრატეგია აღმაშენებელი და გირჩი – მეტი თავისუფლება ჰააგის სისხლის სამართლის საერთაშორისო სასამართლოს მიერ 2008 წლის აგვისტოს ომზე გამოძიებიების დასრულებას ეხმიანებიან.

„სტრატეგია აღმაშენებლის“ ლიდერმა გიორგი ვაშაძემ „დროას“ ლიდერ ელენე ხოშტარიასთან ერთად გამართულ ბრიფინგზე განაცხადა, რომ "აბსოლუტურად სხვა გარემოებებია ჰააგის პროკურორის გადაწყვეტილებიდან გამომდინარე და დღეს არსებული ხელისუფლება არაფერს აკეთებს, რომ ამაზე განსაკუთრებული აქცენტი იყოს".

„გვინდა, საზოგადოების ყურადღება მივაპყროთ უპრეცედენტო გადაწყვეტილებაზე, რომელიც ჰააგის სასამართლოს პროკურორმა მიიღო რუსეთთან მიმართებაში და 2008 წლის ომთან მიმართებაში. აბსოლუტურად სხვა გარემოებებია ჰააგის პროკურორის გადაწყვეტილებიდან გამომდინარე და გვინდა, მართლა მწუხარებით ვთქვათ, რომ დღეს არსებული ხელისუფლება არაფერს აკეთებს, რომ ამაზე განსაკუთრებული აქცენტი იყოს. პრემიერ-მინისტრი საერთოდ განცხადებასაც კი არ აკეთებს ამ საკითხთან დაკავშირებით, კობახიძე, პრორუსული „ქართული ოცნების“ ხელმძღვანელი არაფერს ამბობს, რატომ? იმიტომ, რომ ათი წლის მანძილზე ეს ხალხი გვიმტკიცებდა, რომ ომი დაიწყო საქართველომ. ათი წლის მანძილზე ეს ხალხი ჩვენ გვადანაშაულებდა 2008 წლის ომის დაწყებაში, მაგრამ მნიშვნელოვანია, რა თქვა პროკურორმა.

პირველი, საქართველოს არანაირი ბრალი არ მიუძღვის და არანაირი მტკიცებულება არ არის საქართველოს დანაშაულებრივ ქმედებაზე, ბრალიც კი არ იქნა წარდგენილი ქართულ მხარესთან მიმართებაში. მეორე, ის ფრაზები, მძინარე ცხინვალს დაესხა თავს საქართველო, სამშვიდობოები დაბომბა – ეს ყველაფერი გაქარწყლდა და ცალსახად დღეს დადგენილია მხოლოდ რუსეთის ბრალეულობა.
ჩვენ გვაინტერესებს, აღძრეს თუ არა იგივე ტიპის სისხლის სამართლის საქმე ქართულმა სამართალდამცავმა ორგანოებმა იმ სამ ადამიანთან მიმართებაში, რომლებიც ჰააგის პროკურორის მიერ არიან დასახელებული, როგორც ბრალდებულები საქართველოს წინააღმდეგ განხორციელებულ საომარ მოქმედებებში.
მეორე, არის თუ არა რაიმე კონკრეტული სამოქმედო გეგმა საერთაშორისო ასპარეზზე, რადგან მთლიანად იცვლება სამართლებრივი საფუძვლები, საქართველოს უჩნდება შესაძლებლობა, მოითხოვოს რეპარაცია, ანუ ზიანის ანაზღაურება იმ დევნილებისთვის, რომლებმაც უშუალოდ ზიანი მიიღეს 2008 წლის ომის დროს.
მე ხელში მიჭირავს გაერო-ს რეზოლუცია, რომელიც ეხება უკრაინასთან დაკავშირებით რეპარაციას, რომელიც დაახლოებით ერთი თვის წინ არის მიღებული და აქ არაფერი არაა ნათქვამი საქართველოზე.
მაინტერესებს, რიტორიკულად მაინც ვკითხოთ ამ ანტიქართველებს, რომლებიც დღეს არიან ხელისუფლებაში, აპირებენ თუ არა მსგავსი რეზოლუციის ინიცირებას საქართველოსთან დაკავშირებით, რადგან კიდევ ერთხელ ვამბობ, ფუნდამენტურად იცვლება საერთაშორისო სამართლებრივი მდგომარეობა 2008 წლის ომთან დაკავშირებით და ძალიან მნიშვნელოვანია ახლა კონკრეტული აქტივობები. მინდა, მივმართო არასამთავრობო და იურიდიულ ორგანიზაციებს, მოდით, გავაერთიანოთ ძალისხმევა და იქ, სადაც „ქართული ოცნება“ ჩვენი ქვეყნის ეროვნულ ინტერესებს არ იცავს, ჩვენ მოვამზადოთ სამართლებრივი საფუძვლები, რათა ერთი მხრივ, იყოს განხორციელბული რეპარაცია, ანუ ზიანის ანაზღაურება რუსეთთან მიმართებაში და მეორე მხრივ, საერთაშორისო ასპარეზზე არ ჩამოვიტანოთ საქართველოს საკითხი“, – განაცხადა გიორგი ვაშაძემ.

ჰააგის სასამართლოს მთავარმა პროკურორმა კარიმ ხანმა განაცხადა, რომ აგვისტოს ომის საქმეზე გამოძიების ეტაპი დაასრულა, თუმცა გრძელდება მუშაობა მიხაილ მინძაევის, გამლეტ გუჩმაზოვისა და დავიდ სანაკოევის სასამართლოში წარსადგენად, რომელთა დაკავებაზეც ორდერები გაიცა