ულტიმატუმის ენით არ ელაპარაკებიან მეგობრებს, კოლეგებს და მით უფრო ომში მყოფ მოძმე ერს - გიორგი ხოჯევანიშვილი

ულტიმატუმის ენით არ ელაპარაკებიან მეგობრებს, კოლეგებს და მით უფრო ომში მყოფ მოძმე ერს - ამის შესახებ ამის შესახებ პარლამენტის წევრმა გიორგი ხოჯევანიშვილმა პლენარულ სხდომაზე განაცხადა.

მისი თქმით, „ქართული ოცნება“ ისევ ჯიბრში უდგება ომში მყოფ უკრაინას და ისევ კონფრონტაციის რეჟიმში რჩება.

„ქართული ოცნება“ ისევ ჯიბრში უდგება ომში მყოფ უკრაინას და პარლამენტის თავმჯდომარე უარს ამბობს ან უარს ათქმევინებენ პირდაპირ მხარდაჭერაზე; ნაცვლად იმისა, რომ ყველა ნაბიჯი იყოს ურთიერთობების ნორმალიზაციისკენ გადადგმული, თქვენ ისევ კონფრონტაციის რეჟიმში რჩებით; ულტიმატუმის ენით არ ელაპარაკებიან მეგობრებს, კოლეგებს და მით უფრო ომში მყოფ მოძმე ერს.

უკრაინის ომი ის ომია, რომელიც ჩვენს თავისუფლებასაც ეხება და ეს ის მოცემულობაა, რომელიც სრულყოფილად უნდა გააცნობიეროს დღევანდელმა მმართველმა გუნდმა და სანამ ამას ვერ შეძლებთ იქნებით იმ კინკლაობაში, რომელიც უკვე შეცდომა არაა და რუსული საქმის და მიზნების მსახურებაა.

გასაგებია, რომ ამ ყველაფერს აკეთებთ და ამ მეთოდებით იბრძვით ძალაუფლების შესანარჩუნებლად, მაგრამ ამავე დროს არ უნდა დაგვავიწყდეს, რომ ამ ომში იბრძვიან ჩვენი ბიჭები და ამიტომ, გინდათ თუ არ გინდათ, იქ ჩვენი მოქალაქეები გვწმენდენ პირს ღირსებაზე და სახელმწიფოებრივ თავმოყვარეობაზე და ამ დროს ომში დაღუპული ბიჭების პანაშვიდზე არ მისვლა და გამიზნულად თავის არიდება ძალიან დიდი სირცხვილია. მოგიწოდებთ სათანადოდ დააფასოთ ეს გმირი ბიჭები“, – განაცხადა გიორგი ხოჯევანიშვილმა.