კონგრესმენები ბაიდენს მოუწოდებენ, საქართველოსა და უკრაინას ნატოს არაწევრი მთავარი მოკავშირის სტატუსი მიანიჭოს

აშშ-ის ჰელსინკის კომისია შეერთებული შტატების პრეზიდენტ ჯო ბაიდენს წერილით მიმართავს და მოუწოდებს საქართველოსა და უკრაინას ნატოს არაწევრი ქვეყნის მთავარი მოკავშირის სტატუსი (MNNA) მიანიჭოს.

ჰელსინკის კომისიის წერილი, რომელსაც კონგრესმენები სტივ კოენი, ჯო უილსონი და რიჩარდ ჰადსონი აწერენ ხელს, გამოცემა Foreign Policy-მ მოიპოვა.

"საქართველოს, რომელსაც არ აქვს საკმარისი უსაფრთხოების გარანტიები დასავლეთისგან და რუსული ოკუპაციისა და საფრთხეების წინაშე დგას, ასევე უნდა მიენიჭოს ნატოს არაწევრი მთავარი მოკავშირის სტატუსი, რაც საქართველოსა და აშშ-ს შორის თავდაცვის სფეროში არსებული თანამშრომლობის ჭეშმარიტი გამოხატულებაა და ასევე არ ავალდებულებს აშშ-ს სამხედრო მოქმედებებს",- ნათქვამია წერილში.

კონგრესმენები აშშ-ის პრეზიდენტს უკრაინასა და საქართველოს ნატოში გასაწევრიანებლად ქმედითი ნაბიჯების გადადგმისკენ მოუწოდებენ. მათი განცხადებით, უკრაინისა და საქართველოს ნატოში ინტეგრაციის მიმართ აშშ-ის არასაკმარისი მხარდაჭერა პუტინს ევროპაში თავისი ნეოკოლონიალური მიზნების განხორციელების საშუალებას მისცემს.

"აშშ-მა გაცილებით პროაქტიული პოზიცია უნდა დაიკავოს საქართველოს და უკრაინის ნატოში გაწევრიანების საკითხზე. მიუხედავად იმისა, რომ აშშ მუდმივად მხარს უჭერს საქართველოსა და უკრაინის გაწევრიანებას ნატოში, რუსეთის ოკუპაციამ და მიმდინარე აგრესიამ გამოააშკარავა ევრო-ატლანტიკური სივრცის გაფართოების ხანგრძლივად შეჩერებული პროცესის ტრაგიკული შედეგები. საქართველოსა და უკრაინის ნატოში გაწევრიანების საკითხზე აშშ-ის ძლიერი და პროაქტიული მხარდაჭერის გარეშე, პუტინი შეძლებს მნიშვნელოვანი უპირატესობის მოპოვებას საკუთარი განზრახვის შესასრულებლად - თავდაყირა დააყენოს ევროპის უსაფრთხოება და თანამშრომლობა და სისრულეში მოიყვანოს თავისი ნეოკოლონიალური ზრახვები",- ნათქვამია კონგრესმენების წერილში.

კონგრესმენები რეკომენდაციას უწევენ აშშ-ის ადმინისტრაციას, მთავარი მოკავშირის სტატუსის მინიჭება ასევე განიხილოს ფინეთის, მოლდოვისა და შვედეთისთვის.

ჰელსინკის კომისია აშშ-ის მთავრობის დამოუკიდებელი სტრუქტურაა, რომელიც 1975 წელს შეიქმნა. კომისია ეუთოს რეგიონში ადამიანის უფლებების, დემოკრატიის, ასევე ეკონომიკური, გარემოს დაცვის და სამხედრო თანამშრომლობის ხელშეწყობის გზით, ჰელსინკის შეთანხმებებთან შესაბამისობას აკონტროლებს. ის აერთიანებს სენატის და წარმომადგენელთა პალატის წევრებს, ასევე თითო წევრს სახელმწიფო, თავდაცვისა და ვაჭრობის დეპარტამენტებიდან.

ჰელსკინსკის კომიასიას ხელმძღვანელობენ დემოკრატი სენატორი ბენ კარდინი და წარმომადგენელთა პალატის დემოკრატი წევრი სტივ კოენი.