ლიონელ მესისა და იკერ კასილასის შვილებს ქართველი დიზაინერის ბალიშებზე სძინავთ

ცნობილი ფეხბურთელების ლიონელ მესის, იკერ კასილასისა და ჟორდი ალბას შვილებს ქართველი დიზაინერის ლელა ცისკარაულის აქსესუარებით მორთულ საწოლებში სძინავთ. ამის შესახებ გაზეთი „საქართველოს ამბები“ წერს.

ცისკარაული ბარსელონაში უკვე 12 წელია ცხოვრობს. მან საბავშვო აქსესუარების ბრენდი Deco Sweet BCN  შექმნა. რომლის მომსახურებითაც სარგებლობენ ესპანელი ჟურნალისტები, სპორტსმენები და მსახიობები.

ცისკარაულმა საქართველო 2008 წელს დატოვა, რათა მაგისტრატურა უცხოეთში დაესრულებინა. ამ მიზნისთვის მან ბარსელონა აირჩია. დროთა განმავლობაში ლელას გაუჩნდა იდეა შეექმნა საბავშვო აქსესუარები, ასევე ბალიშები, წინსაფრები, საწოლის თეთრეული, ჩანთები ორსულებისთვის და ეტლები. აბსოლუტურად ყველა ნივთი ერთადერთი ეგზემპლარის სახით მზადდება. ნივთებს ბავშვების სახელები ან ინიციალები აწერია.

„სამი წლის წინ ესპანეთის ნაკრების მეკარის იკერ კასილასის ცოლი სარა კარბონერო მეორე ბავშვს ელოდებოდა. ბარსელონაში ის ძალიან ცნობილი ტელეწამყვანია. როდესაც ელექტრონულ ფოსტაზე მისი წერილი დავინახე, საკუთარ თვალებს არ დავუჯერე, სიხარულისგან ვყვიროდი. ის მწერდა, რომ შემთხვევით გვიპოვა Instagram-ში, მას ძალიან მოეწონა ჩვენი პროდუქცია... მან ორი ბალიში და ბავშვის საწოლისთვის საჭირო ნივთები იყიდა“, - ამბობს ცისკარაული.  

მას შემდეგ, რაც კასილასის ცოლმა ქართველი დიზაინერის მიერ შექმნილი ნივთები მიიღო, სოციალურ ქსელში გამოაქვეყნა ფოტოსურათები და კომპანიის სახელწოდება. იმავე დღეს ცისკარაულმა უამრავი წერილი მიიღო. მას სწერდნენ ორსულები და პროდუქციას უკვეთავდნენ. იმავე თვეს ქართველმა დიზაინერმა 280 შეკვეთა მიიღო. სწორედ მაშინ გახდა მისი მარკა ცნობადი ესპანეთში და მის საზღვრებს გარეთაც.

კასილასის ცოლის შემდეგ ცისკარაულს დაუკავშირდა ფეხბურთელ ჟორდი ალბას ცოლი და ბალიშები და ბავშვის საწოლის აქსესუარები შეუკვეთა. მანაც გამოაქვეყნა სოციალურ ქსელში ფოტოები და ასეთი მშვენიერი პროდუქციის შექმნისთვის დიზაინერს მადლობა გადაუხადა.

 „მეორე დღეს შეტყობინება მივიღე ლიონელ მესის ცოლის - ანტონელა როკუცოსგან. ალბასა და მესის ცოლები ახლო მეგობრები არიან. მან ბალიშების, ჩანთების, თეთრეულის დიდი რაოდენობა შემიკვეთა. ჩვენ ეს ყველაფერი წარმოუდგენელი სისწრაფით დავამზადეთ“, - ამბობს დიზაინერი.

 „სიტყვით ვერ გადმოვცემ, თუ რა მოხდა ამის შემდეგ. საიდან აღარ მწერდნენ - არგენტინიდან, სამხრეთ ამერიკიდან. მას შემდეგ, რაც ანტონელამ გამოაქვეყნა სოციალურ ქსელში ფოტოები, ჩემი მეუღლე დღე და ღამე პასუხობდა  კლიენტების შეკითხვებს მესენჯერსა და ელექტრონულ ფოსტაზე“, - აღნიშნავს ცისკარაული.

მესის ცოლმა ქართველი დიზაინერის სრული პროდუქცია თავისი დისთვისაც შეუკვეთა, რომელიც იმ დროს ბავშვს  ელოდებოდა.