„თბილისის მეწარმეობის ხელშეწყობის ცენტრმა“ მუნიციპალური პროგრამის პრეზენტაცია გაიმართა

თბილისის მერი დავით ნარმანია „თბილისის მეწარმეობის ხელშეწყობის ცენტრის“ მუნიციპალური პროგრამის პრეზენტაციას სახელწოდებით „სავარჯიშო-გამაჯანსაღებელი მომსახურების დარგის განვითარება“ დაესწრო. პრეზენტაციაზე თბილისის მეწარმეობის ხელშეწყობის ცენტრის წარმომადგენლებმა პოტენციური ბენეფიციარებს და სხვა დაინტერესებულ მხარეებს პროგრამის ფარგლებში შემუშავებული ხელშეწყობის ინსტრუმენტებისა და პროგრამის განხორციელების დეტალებს გააცნეს.

აღნიშნული პროგრამა თბილისის საკრებულომ მიმდინარე წლის 30 ოქტომბერს დაამტკიცა. პროგრამის ძირითადი მიზანია ახალი გამაჯანსაღებელი ცენტრების შექმნისა და არსებული გამაჯანსაღებელი ცენტრების განვითარების ხელშეწყობა, ასევე, პროფესიული უნარ-ჩვევების გაუმჯობესების მიზნით პერსონალის გადამზადება. პროგრამა ხელს შეუწყობს სავარჯიშო-გამაჯანსაღებელი მომსახურების დარგში მოქმედი მეწარმე სუბიექტების როგორც სამეწარმეო პირობების, ასევე, პროფესიული ცოდნის ამაღლებას.

თბილისის მერის, დავით ნარმანიას განცხადებით, აღნიშნული პროგრამა ერთის მხრივ ჯანსაღი ცხოვრების წესის პოპულარიზაციას ისახავს მიზნად, მეორეს მხრივ კი აღნიშნული ინდუსტრიის განვითარებას შეუწყობს ხელს.

„აღნიშნული პროგრამა, დედაქალაქის მასშტაბით, სპორტული ინდუსტრიის განვითარებას ისახავს მიზნად. ერთის მხრივ არსებობს მოთხოვნა, მეორეს მხრივ, მცირე და საშუალო ბიზნესის წარმომადგენლებს, ვისაც სურთ სპორტის დარგში ბიზნესის წარმოება, მხარდაჭერა სჭირდებათ. ჩვენ ამისთვის გავაკეთეთ ეს პროგრამა, შევიმუშავეთ მისი ძალიან საინტერესო მიმართულებები, რითაც ხელს შევუწყობთ ცხოვრების ჯანსაღი წესის პოპულარიზაციას, სულ უფრო მეტი მოზარდის და ბავშვის ჩართულობას სპორტში და შედეგად აღნიშნული ინდუსტრიის განვითარებას“,- განაცხადა დავით ნარმანიამ.

პრეზენტაციას თბილისის ვიცე-მერი, საქართველოს სპორტისა და ახალგაზრდობის საქმეთა მინისტრი, ეკონომიკისა და მდგრადი განვითარების მინისტრის მოადგილე, საკრებულოს თავმჯდომარე, პოტენციური ბენეფიციარები, დიპლომატიური კორპუსის, სპორტულის სფეროსა და უცხოური დონორი ორგანიზაციების წარმომადგენლები დაესწრნენ.