სიტყვები არ მყოფნის ამ ტკივილის გადმოსაცემად - გიორგი კვირიკაშვილი

საქართველოს პრემიერ-მინისტრი გიორგი კვირიკაშვილი თბილისში, ბარათაშვილის ქუჩაზე ერთ-ერთი შენობიდან შუშის ჩამოვარდნის შედეგად დაშავებული 6 მოზარდიდან ერთ-ერთის გარდაცვალებას ეხმიანება.

პრემიერი მომხდარზე მწუხარებას გამოთქვამს.

,,უდიდეს მწუხარებას გამოვთქვამ ბარათაშვილის ქუჩაზე მომხდარი ტრაგედიის გამო, რომელსაც 14 წლის ასლან მამედოვის სიცოცხლე ემსხვერპლა.

ამ უმძიმეს წუთებში, სამძიმარს და თანადგომას ვუცხადებ მის მშობლებს, ოჯახს, თანატოლებსა და პედაგოგებს.

სრულიად შეძრული ვარ მომხდარით და სიტყვები არ მყოფნის ამ ტკივილის გადმოსაცემად", - წერს კვირიკაშვილი.

შეგახსენებთ, თბილისში, ბარათაშვილის ქუჩაზე "საქართველოს სახელმწიფო ელექტროსისტემის" შენობიდან შუშა ჩამოვარდა.

შუშა გამვლელებს დაეცა, მათ შორის 6 ბავშვს, რომლებიც ტერიტორიაზე მასწავლებელთან ერთად იმყოფებოდნენ.

შსს-ს ინფორმაციით, მომხდარზე გამოძიება სსკ-ის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.