ავღანეთში დაჭრილი ქართველი სამხედრო სამშობლოში დაბრუნდა

საქართველო, თბილისი - 10:12 | 10.11.2015

ნანახია: 2155

ავღანეთში "მტკიცე მხარდაჭერის" მისიის დროს დაჭრილი სერჟანტი პაატა როსტობაია დღეს სამშობლოში დაბრუნდა. სერჟანტ როსტობაიას აეროპორტში საქართველოს თავდაცვის მინისტრი თინათინ ხიდაშელი და ოჯახის წევრები დახვდნენ.
თავდაცვის სამინისტროს ინფორმაციით, ფარვანის პროვინციაში დაჭრილი სერჟანტი მკურნალობას გერმანიაში, ლანდშტულის ამერიკულ სამხედრო ჰოსპიტალში გადიოდა.
მათივე განმარტებით, ინტენსიური თერაპიის კურსის გავლის შემდეგ პაატა როსტობაია რეაბილიტაციას ამერიკელი სამხედრო ექიმების ზედამხედველობის ქვეშ გადიოდა.
"ავღანეთში "მტკიცე მხარდაჭერის" მისიის ფარგლებში პატრულირებისას ქართველ სამხედროებზე ჩასაფრება განხორციელდა. სროლების დროს IV მექანიზირებული ბრიგადის 43-ე ბატალიონის სერჟანტი პაატა როსტობაია დაიჭრა, პირველი კლასის რიგითი ვასილ ყულჯანიშვილმა კი თავის არეში სასიკვდილო ჭრილობა მიიღო და ადგილზევე დაიღუპა", - ნათქვამია თავდაცვის სამინისტროს მიერ გავრცელებულ ინფორმაციაში.