შუალედური შედეგების მიხედვით, ზაზა ფაჩულია თავის კატეგორიაში მეორე ადგილს ინარჩუნებს

NBA-ს „ყველა ვარსკვლავის“ მატჩის ხმების შუალედური შედეგების მიხედვით, რომელიც ცოტა ხნის წინ გამოქვეყნდა, ზაზა ფაჩულია თავის კატეგორიაში მეორე ადგილს ინარჩუნებს.

დასავლეთ კონფერენციის ფორვარდთა შორის ზაზა ფაჩულიას 823 376 ხმა აქვს. მას მხოლოდ კევინ დურანტი უსწრებს „გოლდენ სტეიტიდან“ (987 479 ხმა). მესამე ადგილზე კავაი ლეონარდია (სან ანტონიო) - 630 766 ხმა. 

„ყველა ვარსკვლავის“ მატჩისთვის ორი მცველი და სამი ფორვარდი შეირჩევა, თუმცა წინა წლებისგან განხვავებით, ფანების ხმები ქულების მხოლოდ 50%-იანი წილია, დანარჩენ 50%-ს კი ასოციაციის კალათბურთელებისა და ჟურნალისტების ხმები (25-25%) წარმოადგენს. ხმების მიცემა 16 იანვრამდე არის შესაძლებელი. 

შარშან ზაზა ფაჩულიას 14 000 ხმა დააკლდა „ყველა ვარსკვლავის“ მატჩში მოსახვედრად.