სუს-ის მიერ დაშინებული პარტიის წევრები და პაატა ბურჭულაძის სკანდალური განცხადება

მოძრაობა სახელმწიფო ხალხისათვის ლიდერი პაატა ბურჭულაძე სკანდალურ განცხადებას აკეთებს. ის, სახელმწიფო უსაფრთხოების სამსახურის თანამშრომლებს მოუწოდებს, რომ ნუ უთვალთვალებენ და აშანტაჟებენ მათ მხარდამჭერებს.

წინააღმდეგ შემთხვევაში პაატა ბურჭულაძე იმ ვიდეოფირების გასაჯაროებას გეგმავს, სადაც როგორც თავად ამბობს, სუს-ის მიერ დაშინებული მისი თანაპარტიელები განვითარებულ მოვლენებს ყვებიან. 

გადაცემა "არჩევანში" პაატა ბურჭულაძემ აღნიშნა, რომ სუს-ის თანამშრომლები მისი თანამოაზრეების მიმართ ზეწოლას ყველა რეგიონში ახდენენ. 

"ჩვენი გუნდის კიდევ ერთი წევრი გვირეკავს, რომ მესამე დღეა მასზე არის ზეწოლა. ისინი ითხოვენ მისგან და სხვებისგან, რომ თქვი რომ მიდიხარ პარტიიდან იმიტომ რომ ესენი არიან ნაციონალური მოძრაობის წევრები. ეს არის "ქართული ოცნების" მესიჯი, რომლითაც უნდათ რომ ჩვენ მოგვაყენონ ზიანი. როცა გვირეკავენ, ჩვენი მეგობრები, ისინი ამბობენ, რომ იძულებულები ვართ რომ გამოვიდეთ და ეს ვთქვათ. ჩვენ ვეუბნებით, რომ მოდით და ჩაგწერთ. ყველას გმირობას ვერ მოთხოვ, ოჯახები ყავთ. ამ ჩანაწერებს ჩვენ ვაგროვებთ. ამ გოგოს ვიდეო ჩვენ გვაქვს. თუ ასე გაგრძელდა ჩვენ ამას დავაგროვებთ და ერთად გავავრცელებთ. გვაქვს ვიდეოები სხვადასხვა რაიონებიდან. ეს ადამიანები ჩამოდიან და წერენ ამ ვიდეოებს. ეს არის კონსტიტუციური უფლების წართმევა, ეს ადამიანები გმირები არიან. ამას აკეთებენ სუს-ის თანამშრომლები. სუსი ჩვენ უნდა გვებრძოდეს და ტელევიზიით რუსი აგენტები უნდა გამოდიოდნენ? ეს არის სამართლიანობა? იმედი მაქვს რომ თავს დაგვანებებენ. მე არ მაქვს იმედი, რომ სასამართლოში რომ მივალ და იქ მურუსიძე დამხვდება რას იზამს. ჩვენ ეს ვიდეოები გვაქვს და დაგვანებონ თავი, თორე ამ ვიდეოებს გამოვაქვეყნებ", - განაცხადა პაატა ბურჭულაძემ.