თბილისის საერთაშორისო აეროპორტში მგზავრთნაკადი 19 %-ით გაიზარდა

იანვარ-ივნისის მონაცემებით,  თბილისის საერთაშორისო აეროპორტში მგზავრთნაკადი 19 %-ით გაიზარდა. სამოქალაქო ავიაციის სააგენტოს ინფორმაციით, 2016 წელის 6 თვეში ქვეყნის მთავარი აეროპორტის მომსახურებით 893 ათას 222 მგზავრმა ისარგებლა. სტატისტიკური მონაცემების მიხედვით ირკვევა, რომ 2016 წლის იანვარ-ივნისში, გასული წლის  ანალოგიურ პერიოდთან შედარებით, თბილისის საერთაშორისო აეროპორტმა 19,22 %-ით მეტი მგზავრი გაატარა, ხოლო 2014 წლის ექვს თვესთან შედარებით კი 33,55 %-ით მეტი.

სამოქალაქო ავიაციის სააგენტოს განმარტებით, 2015 წლის იანვარ-ივნისში თბილისის საერთაშორისო აეროპორტი 749 ათას 230 მგზავრს, ხოლო 2014 წლის იანვარ-ივნისში - 668 818 მგზავრს მოემსახურა.

შეგახსენებთ, რომ 2016 წლის პირველი ნახევრის მონაცემებით, საქართველოს აეროპორტები 21,33%-ით მეტ მგზავრს მოემსახურა. კერძოდ მიმდინარე წელს, საქართველოს აეროპორტების მიერ რეგულარული და ჩარტერული რეისების შედეგად სულ გადაყვანილ იქნა 1 მლნ 82 ათას 828 მგზავრი, რაც 21,33%-ით აღემატება წინა წლის ანალოგიურ მონაცემებს (892 468 მგზავრი).