ბათუმში, გმირთა ხეივანში, სასტუმროს მშენებელი ინვესტორი 15 ივლისს გაირკვევა. აჭარის ფინანსთა და ეკონომიკის სამინისტროს მიერ გამოცხადებულ პირობებიან აუქციონზე ტ. აბუსერიძის ქ. N15/ფიროსმანის ქ. N5-/აბუსერიძის ქუჩა 17-ში მდებარე 3769 კვ.მ  არასასოფლო- სამეურნეო დანიშნულების მიწის ნაკვეთი იყიდება, რომლის საწყისი ღირებულებაც 1 მლნ 410 ათასი ლარია.

პირობების მიხედვით ინვესტორმა მრავალფუნქციორი შენობა ექსპლუატაციაში, ხელშეკრულების გაფორმებიდან 54 თვის ვადაში უნდა შეიყვანოს. მრავალფუნქციური ნაგებობა კი თავის მხრივ უნდა მოიცავდეს მინიმუმ 80 ნომერზე გათვლილ სასტუმროს. მყიდველის სურვილის შემთხვევასი შენობის ნაწილში დასაშვებია საცხოვრებელი აპარტამენტების განთავსებაც. ასევე 2000 კვ.მ-ზე უნდა მოეწყოს მიწისქვეშა ავტოსადგომი და სტილობატი (ე.წ "პოდიუმი"), რომელის გამოყენებაც საზოგადოებრივი და კომერციული დანიშნულებით მოხდება.

პროექტის განხორციელებისათვის კი ინვესტორმა მინიმუმ 9 მლნ 300 ათასი დოლარის ინვესტიცია უნდა განახორციელოს.

შეგახსენებთ, რომ გმირთა ხეივნის განვითარების კონცეფციაზე აჭარის ფინანსთა და ეკონომიკის სამინისტრომ იმუშავა. ტერიტორიის ფართობია 3 ჰა. დაგეგმარების მიხედვით ხეივანი 14 საინვესტიციო მიწის ნაკვეთად დაიყო, რომლის ათვისება 3 ეტაპად განხორციელდება.

კონცეფციის მიხედვით შენობის მაქსიმალური სიმაღლე 140, ხოლო მინიმალური 30 მეტრი განისაზღვრა. ტერიტორიაზე სასტუმროების, აპარტამენტების, რესტორნების, სხვადასხვა გასართობი ობიექტებისა და სპორტული ცენტრების განთავსება იქნება შესაძლებელი. გმირთა ხეივნის განვითარების კონცეფციის მიზანი საინვესტიციო გარემოს გაუმჯობესება, ბიზნესის/ტურიზმის ხელშეწყობა,სამუშაო ადგილების შექმნა და ქალაქის ინფრასტრუქტურის განვითარებაა.

იმავდროულად, გმირთა ხეივანში 3 ახალი ინვესტიციის განხორციელება უკვე დაიწყო.