ევროპის საბჭოს საპარლამენტო ასამბლეამ ვლადიმირ პუტინის რეჟიმი დიქტატურად აღიარა. ასამბლეა მოუწოდებს საერთაშორისო საზოგადოებას, 2024 წელს, ვლადიმირ პუტინის ამჟამინდელი ვადის ამოწურვის შემდეგ მისი პრეზიდენტობა არალეგიტიმურად აღიაროს.

„პრეზიდენტის აბსოლუტურმა ძალაუფლებამ, რომელიც გამოწვეულია ზედმეტად გრძელვადიანი მმართველობით და რომელსაც ემატება ყოველგვარი კონტროლის, ბალანსის ნაკლებობა, როგორებიცაა ძლიერი პარლამენტი, დამოუკიდებელი სასამართლო სისტემა, დამოუკიდებელი მედია და აქტიური სამოქალაქო საზოგადოება, აქცია რუსეთის ფედერაცია დე ფაქტო დიქტატურად“, – აღნიშნულია რეზოლუციაში.

ასამბლეამ კიდევ ერთხელ დაუჭირა მხარი საერთაშორისო სისხლის სამართლის ტრიბუნალის შექმნას, რომელიც პასუხისგებაში მისცემს რუსეთის ხელმძღვანელობას, მათ შორის, პუტინს, უკრაინაში ჩადენილი დანაშაულებისთვის.

შეგახსენებთ, 2023 წლის 17 მარტს უკრაინელი ბავშვების არაკანონიერი დეპორტაციის გამო ჰააგის სისხლის სამართლის საერთაშორისო სასამართლომ ვლადიმირ პუტინის დაპატიმრების ორდერი გასცა. ამასთან, ორდერი გაიცა ბავშვთა საკითხების ომბუდსმენის, მარია ლვოვა-ბელოვას დაკავებაზეც.