გერმანიის თავდაცვის მინისტრმა, ბორის პისტორიუსმა უკრაინისთვის გაზაფხულისთვის მილიარდი ევროს ოდენობის სამხედრო დახმარების პაკეტის გამოყოფის შესახებ განაცხადა.

ამის შესახებ ბორის პისტორიუსმა გერმანიაში, "რამშტაინის" სამხედრო ბაზაზე უკრაინის საკონტაქტო ჯგუფის შეხვედრის კულუარებში განაცხადა. იუწყება უკრაინული მედია გერმანიის საზოგადოებრივ მაუწყებელ ZDF-ზე დაყრდნობით.

პისტორიუსის განცხადებით, სამხედრო დახმარების პაკეტი მოიცავს Marder-ის ტიპის 40 ქვეითთა მანქანას, Gepard-ს შვიდ თვითმავალ საზენიტო დანადგარს, Iris-T საზენიტო-სარაკეტო კომპლექსს და რაკეტებს.

ამგვარად, გერმანიის მიერ უკრაინისთვის გაწეული სამხედრო დახმარება 3,3 მილიარდ ევროს გადააჭარბებს.

„გერმანია არ გაჩერდება და არ იტყვის უარს უკრაინის მხარდაჭერაზე“, – აღნიშნა პისტორიუსმა.

მისივე განცხადებით, მოკავშირეებს უკრაინისთვის Leopard 2-ის ტანკების მიწოდების საკითხზე შეთანხმებისთვის ჯერ არ მიუღწევიათ.