რუსეთი სომხეთს აზერბაიჯანთან სამშვიდობო მოლაპარაკებების ჩაშლაში ადანაშაულებს.

ამის შესახებ საუბარია რუსეთის საგარეო საქმეთა სამინისტროს პრესსპიკერის მარია ზახაროვას კომენტარში, რომელიც უწყების გვერდზე გამოქვეყნდა.

ზახაროვას თქმით, სომხეთის გადაწყვეტილებამ მოსკოვში, დეკემბერში დაგეგმილი შეხვედრის გაუქმების შესახებ, ხელი შეუშალა სამშვიდობო შეთანხმებაზე მოლაპარაკებებს.

„სწორედ სომხეთის ხელმძღვანელობამ ბოლო მომენტში გააუქმა სომხეთის საგარეო საქმეთა მინისტრ მირზოიანის ვიზიტი. ამან ხელი შეუშალა არა მხოლოდ სამშვიდობო მოლაპარაკებებზე მსჯელობას, არამედ სომხეთ-აზერბაიჯანის  სხვა გადაუდებელი საკითხების ნორმალიზაციას, მათ შორის ლაჩინის დერეფნის ირგვლივ სიტუაციას“, - განაცხადა ზახაროვამ.

მისი თქმით, თუ სომხეთი რეალურად დაინტერესებულია აღნიშნული პრობლემების მოგვარებაში, უმაღლეს დონეზე სამმხრივი შეთანმების კომლექსური რეალიზაციის შესაბამისად, მაშინ, აუცილებელია გაგრძელდეს ერთობლივი მუშაობა.

„რუსეთის წინადადება, დაუთმოს სივრცე სამშვიდობო შეთანხმებისთვის სომხეთ-აზერბაიჯანის მოლაპარაკებებს, ძალაში რჩება“, - განაცხადა ზახაროვამ.

ბოლო პერიოდში სომხეთი არაერთხელ აღნიშნავდა, რომ ვერ გრძნობს რუსეთის მხრიდან საჭირო მხარდაჭერას აზერბაიჯანთან კონფლიტქში.

 სომხეთის უსაფრთხოების საბჭოს მდივანმა არმენ გრიგორიანმა დეკემბერში განაცხადა, რომ რუსეთი, სომხეთს აიძულებს დერეფანი გაუხსნას აზერბაიჯანს და შეუერთდეს რუსეთ-ბელარუსის სამოკავშირეო სახელმწიფოს.