არიან ადამიანები, ომის პარტიის წარმომადგენლები, რომლებიც ცდილობენ, რაც შეიძლება მეტი ადამიანი ჩართონ ამ ბრძოლაში და ომში, - ამის შესახებ ფრაქცია "ქართული ოცნების" თავმჯდომარე მამუკა მდინარაძე უკრაინაში წასულ ქართველ მებრძოლებთან დაკავშირებით.

"მეც გიდასტურებთ და თქვენც იცით, რომ არიან ადამიანები, რომლებიც უკრაინაში ვიღაცის მოწოდებით არიან წასულები და ვიღაცის წაყვანილები არიან, ასეთებიც არიან. არიან ადამიანები, რომლებიც თავისი გმირული სულისკვეთებით და რწმენით იბრძვიან და ასეთებიც ბევრნი დაიღუპნენ, მათ შორის და მინდა ვისარგებლო შემთხვევით და მეც სამძიმარი გამოვუცხადო თითოეული გარდაცვლილის ოჯახს. თქვენ თუ თვლით და მიგაჩნიათ, რომ მაინცდამაინც ერთი მიმართულებით უნდა გაიგოთ, სწორად იგებს საზოგადოება. დიახ, ყველამ იცის, რომ სოფელ-სოფელ დადიან და ეძებენ ადამიანებს, ვინ წაიყვანონ და რომანტიზება როგორ მოახდინონ ამ ამბების. ეს ხომ ასეა, მე ხომ არ ვიგონებ. სოფელ-სოფელ, რაიონ-რაიონ დადიან და რა თქმა უნდა, არიან ადამიანები, რომლებიც და ვიცი, ერთი მებრძოლი ადამიანის შვილი დაიღუპა, უამრავი, სამწუხაროდ, რამდენიმე ათეული ბიჭი დაიღუპა, რომლებიც არიან ადამიანები, რომლებიც რწმენით და ვაჟკაცობით იბრძვიან და სწამთ, რომ იბრძვიან თავისი ქვეყნისთვის. მაგრამ არიან ისეთები, რომლებიც სხვა გზით არიან წასულები. შეიძლება მათაც რწმენა გააჩნიათ, მაგრამ ხომ ვიცით ყველამ, რომ სოფელ-სოფელ დადიან და ცდილობენ, რომ წაიყვანონ. არიან ადამიანები, ომის პარტიის წარმომადგენლები, რომლებიც ცდილობენ, რაც შეიძლება მეტი ადამიანი ჩართონ ამ ბრძოლაში და ომში, არიან, ეს ხომ იცით ყველამ, მე მგონია რომ იცით და არ ამბობთ", - თქვა მდინარაძემ.

გუშინ, 5 დეკემბერს ირაკლი ღარიბაშვილმა თქვა, რომ ქართველი მებრძოლები უკრაინაში "ომის პარტიას" მიჰყავს.