სააკაშვილის გათავისუფლება და სასჯელის გადავადება თუ არ მოხდება, ჩათვალეთ, ეს მისთვის სასიკვდილო განაჩენი იქნება, – ამის შესახებ საქართველოს ყოფილი პრეზიდენტის, მიხეილ სააკაშვილის ადვოკატმა, შალვა ხაჭაპურიძემ განაცხადა.

ადვოკატის თქმით, ამ საქმის მოსამართლე გიორგი არევაძე იქნება.

„არევაძეს ერთ-ერთი განაჩენი აქვს გამოტანილი შეწყალების საქმესთან დაკავშირებით. მისი გამოტანილია მიხეილ სააკაშვილის მიმართ გამამტყუნებელი განაჩენი და, როგორც ჩანს, ამ პრინციპით დაეწერა. ამას გავარკვევთ, რა მეთოდით იქნა დაწერილი გიორგი არევაძეზე. გიორგი არევაძე გამოცდილი მოსამართლეა, მასთან ჩვენ არაერთ საქმეზე გვიმუშავია. იმ შემთხვევაში, თუ სააკაშვილის სასჯელის გადავადება, გათავისუფლება არ მოხდება, მისი სიცოცხლე აშკარად საფრთხეშია. ჩათვალეთ, ეს მისთვის სასიკვდილო განაჩენი იქნება“, – განაცხადა შალვა ხაჭაპურიძემ.

ყოფილი პრეზიდენტის, მიხეილ სააკაშვილისთვის სასჯელის გადავადების მოთხოვნით, ადვოკატებმა სასამართლოს პირველ დეკემბერს მიმართეს.