6 წელია ვიცნობ და მსგავსი არაფერი მინახავს, კაცს ფერი არ ედო სახეზე, - განაცხადა აშშ-ის საელჩოში მომხდარი ინციდენტის კომენტირებისას ანრი ოხანაშვილის შესახებ "ქართული ოცნების"დეპუტატმა ბექა ოდიშარიამ.

მისი თქმით, ანრი ოხანაშვილმა, რომელიც ძალიან აღელვებული იყო, მას კიდევ რამდენიმე დეპუტატს უთხრა, რომ ვატო წერეთელმა უმძიმესი შურაცხყოფა მიაყენა.

"გიამბობთ მხოლოდ იმას, რაც ჩემი ორი თვალით დავინახე და ორი ყურით გავიგონე. ღონისძიების შემდეგ გასასვლელისკენ რამდენიმე კოლეგა მივდიოდით ერთმანეთის მიყოლებით, რა დროსაც გამოჩნდა საოცრად აღელვებული ანრი ოხანაშვილი, რომელსაც 6 წელია ვიცნობ და მსგავსი არაფერი მინახავს - კაცს ფერი არ ედო სახეზე. მან ისაუბრა უმძიმესი შეურაცხყოფის შესახებ, რომელიც მას და მთელ გუნდს მიაყენეს. იმის გამო, რომ ჩვენ ვიყავით ისეთ ადგილას და ისეთ თარიღზე, რომ ეს ჩვენ სხვა არაფრის ფიქრის საშუალებას არ გვაძლევდა, რომ ეს იყო პროვოკაცია, მიუხედავად ამისა, ჩვენ განვაგრძეთ ინერციით გასასვლელისკენ წასვლა, რა დროსაც გამოჩნდა ამ მიმართულებით ვატო წერეთელი, თანმხლებ ქალბატონ კოლეგასთან ერთად." - განაცხადა დეპუტატმა.

მისი თქმით, ცდილობდნენ ვითარების განმუხტვას, თუმცა შეხლა-შემოხლა ვერ აირიდეს თავიდან.

"სამწუხაროდ, შეხლა-შემოხლა ვერ ავირიდეთ. იმას, რომ ადამიანები ვცდილობდით, რომ ეს განგვემუხტა, ამას ადასტურებს თავად ვატო წერეთელი და მისი თანმხლები ქალბატონი კოლეგა. შესაბამისად, დანარჩენზე შეფასებებზე, ფაქტებზე და ამ მოვლენაზე ვისაუბროთ მას შემდეგ რაც გასაჯაროვდება კამერების ფირები" - აცხადებს ოდიშარია.