საქართველოს განაცხადთან დაკავშირებით გადაწყვეტილებას ევროკომისია 15 ივნისამდე მიიღებს, - აცხადებს ბრიუსელში ვიზიტით მყოფი საქართველოს საგარეო საქმეთა მინისტრი ილია დარჩიაშვილი.

როგორც ილია დარჩიაშვილმა აღნიშნა, საქართველოს მთავრობა პარალელურად აგრძელებს პარტნიორებთან მუშაობას ამ მიმართულებით.

მინისტრის თქმით, ბრიუსელში ვიზიტის ფარგლებში, მას შეხვედრები ექნება ევროკომისრებთან და ევროპარლამენტარებთან, სადაც განიხილება საქართველოს მიერ ევროკავშირის წევრობაზე შეტანილ განაცხადთან დაკავშირებით არსებული მოლოდინები და შესაძლებლობები.

"იმედი მაქვს, ეს შეხვედრები იქნება ძალიან ღია და შინაარსიანი და ჩვენ გვექნება შესაძლებლობა გავცვალოთ ხედვები, მოლოდინები და ის პერსპექტივები, რომელიც საქართველოს აქვს ამ პროცესში", - აღნიშნა ილია დარჩიაშვილმა.

დარჩიაშვილის განცხადებით საქართველო, ევროინტეგრაციის გზაზე გაწეული ძალისხმევისა და განხორციელებული რეფორმებით იმსახურებს პოზიტიურ გზავნილს ევროპელი პარტნიორებისგან. მისივე თქმით როგორიც არ უნდა იყოს პოლიტიკური გადაწყვეტილება საქართველო გააგრძელებს ევროკავშირში ინტეგრაციის პროცესს და მხარდაჭერას.

შეგახსენებთ, საქართველომ ევროკავშირის წევრობის განაცხადი 3 მარტს წარადგინა. 11 აპრილს საქართველოს ოფიციალურად გადაეცა წევრობის კანდიდატი ქვეყნის სტატუსის თვითშეფასების კითხვარი. საქართველოს მთავრობამ კითხვარის პირველი, შევსებული ნაწილი ბრიუსელს 2 მაისს გაუგზავნა, ხოლო მეორე ნაწილი - 10 მაისს.