უკრაინის რადამ ლუდმილა დენისოვა გადააყენა
უკრაინის უმაღლესმა რადამ 31 მაისს გამართულ სხდომაზე უმაღლესი რადის ადამიანის უფლებათა კომისარი, ომბუდსმენი ლუდმილა დენისოვა თანამდებობიდან გადააყენა.
გადაწყვეტილებას მხარი 234-მა სახალხო დეპუტატმა დაუჭირა.
უკრაინული მედიის მიერ გავრცელებული ცნობით, "დენისოვას მიმართ დეპუტატების მიერ წაყენებულ პრეტენზიებს შორისაა მედიასთან მისი აპარატის მუშაობის კონცენტრირება "გარყვნილი ფორმით სექსუალური დანაშაულების" დეტალებზე, რისი დადასტურებაც მტკიცებულებებით მან ვერ შეძლო, ჰუმანიტარული დერეფნების ორგანიზების საკითხებისგან დისტანცირება და საზღვარგარეთ გატარებული დიდი დრო".
მანამდე ლუდმილა დენისოვამ განაცხადა, რომ მისი თანამდებობიდან გადაყენებით უკრაინის პრეზიდენტის ადმინისტრაცია იყო დაინტერესებული.
30 მაისს გამართულ საგანგებო პრესკონფერენციაზე ლუდმილა დენისოვამ განაცხადა, რომ ომბუდსმენისთვის უნდობლობის გამოცხადება უკრაინის კონსტიტუციისა და საერთაშორისო სამართლებრივი აქტების დარღვევა იქნებოდა.
