უკრაინის პრეზიდენტის ოფისის ხელმძღვანელის მრჩეველმა, ოლექსი არესტოვიჩმა იუთუბ-არხ "ფეიგინ ლაიფის" მორიგ გადაცემაში ოკუპირებულ ცხინვალში რუსეთთან შეერთების თაობაზე დანიშნული ე.წ. რეფერენდუმის თაობაზეც ისაუბრა.

მან უპასუხა შეკითხვას, რამდენად აქვს "საქართველოს ცხინვალში შესვლის შანსი, თუ გავითვალისწინებთ იმას, რომ ოკუპირებულ ტერიტორიაზე განთავსებული რუსეთის ჯარის ნაწილი უკრაინაშია გადასროლილი". არესტოვიჩის თქმით, "საქართველოს ხელისუფლება არ გამოიყურება ისე, რომ ახლა ცხინვალში შესვლა შეეძლოთ".

"მე კარგად არ ვიცი საქართველოს შეიარაღებული ძალების მდგომარეობა. ვერ ვიტყვი, შეუძლიათ თუ არა მათ ცხინვალში შესვლა, არის თუ არა ჯარი ახლა შესაბამის მდგომარეობაში, მაგრამ მე კარგად ვიცი საქართველოს ხელისუფლების მდგომარეობა. ისინი არ გამოიყურებიან ისე, რომ ეს შეეძლოთ. შეიძლება, შეუძლიათ, მაგრამ მე ასე არ მგონია, რადგან ქვეყნის ხელისუფლება არ შეიძლება შედიოდეს კამათში ორ შტატგარეშე მრჩეველთან - ჩემთან და პოდოლიაკთან. ეს ხდება პრემიერ-მინისტრისა და მმართველი პარტიის ლიდერის დონეზე და ასე შემდეგ. როგორც წესი, ეს მაშინ ხდება, როდესაც ძალიან ზუსტად მოარტყამ მტკივნეულ ადგილზე. თუმცა, ქართველი ხალხი იკითხავს, „ბიჭებო, როგორაა ზოგადად ტერიტორიული მთლიანობის საკითხი, როდესაც ჩვენი კუთვნილება მიაქვთ ახლა უკვე არა მხოლოდ დე ფაქტო, არამედ უკვე დე იურე", - განაცხადა არესტოვიჩმა.

მისი თქმით, საინტერესოა, დასავლეთი როგორ რეაგირებას მოახდენს ოკუპირებულ ცხინვალში დაგეგმილ ე.წ. რეფერენდუმზე.