გამოცემა Financial Times-ი, საკუთარ წყაროებზე დაყრდნობით, იტყობინება, რომ რუსეთი მაღალი სიზუსტის რაკეტების დეფიციტის წინაშე დგას.

"მათი მარაგი შეზღუდულია, ისინი მცირდება და ჩვენ ვხედავთ, რომ მათ უწევთ "კალიბრის" რაკეტების გადატანა სხვა სტრატეგიული მიმართულებებიდან, სადაც მათი შენახვა შესაძლებელია", - განუცხადა Financial Times-ს დასავლეთის ოფიციალურმა პირმა.

"ეს იმაზე მეტყველებს, რომ მათი მაღალი სიზუსტის რაკეტების მარაგი იწურება", - დასძინა მან.

კიდევ ერთი წყაროს ინფორმაციით, ომის ამ ეტაპზე, რუსული სარაკეტო იერიშების უმეტესობა კონცენტრირებულია დონბასის აღმოსავლეთ ნაწილსა და ქალაქ მარიუპოლზე. მისი თქმით, დაბომბვის ბრძანებების უმეტესობა თავისი შინაარსით არის "უგუნური და არც თუ ისე ზუსტი".

"ვფიქრობთ, რომ ეს მიანიშნებს იმ პრობლემებზე, რაც რუსებს აქვთ [მაღალი სიზუსტის საბრძოლო მასალის] მიწოდებასთან დაკავშირებით", - უთხრა ამერიკელმა მაღალჩინოსანმა Financial Times-ს.

გამოცემის ინფორმაციით, აღნიშნული პრობლემები შესაძლოა დაკავშირებული იყოს დასავლეთის სანქციებთანაც, რომელიც ზღუდავს წარმოების პოტენციალს მაშინ, როდესაც ეს განსაკუთრებით საჭიროა ბრძოლის ველზე.

უკრაინის თავდაცვის მინისტრის მოადგილემ ანა მალიარმა ამ კვირაში განაცხადა, რომ რუსეთმა უკვე გაუშვა 1300 მაღალი სიზუსტის რაკეტა უკრაინაში, მათ შორის 235 "კალიბრის" რაკეტა.

Forbes-ის გამოთვლებით, უკრაინის წინააღმდეგ გასროლილი რაკეტების ჯამური ღირებულება 7,5 მილიარდი დოლარია.

ომის დაწყებიდან, მალიარის თქმით, რუსული რაკეტების მარაგი განახევრდა და მომავალში მარაგების შესავსებად, რუსეთს უცხოეთში დამზადებული კომპონენტების მიღება დასჭირდება.

"ვინაიდან სანქციები მოქმედებს და რუსეთი იყენებდა სხვა ქვეყნების კომპონენტებს იარაღისთვის, ახლა მათ გაუჭირდებათ მარაგების შევსება", - თქვა მალიარმა.

ფოტო: უკრაინელი მებრძოლი რუსულ რაკეტასთან/AFP