გაეროს გენერალური მდივანი, ანტონიო გუტერეში კიევის ოლქში, რუსებისგან გათავისუფლებულ ქალაქებში ჩავიდა. ის იმყოფებოდა ბოროდიანკასა და სხვა დასახლებებში , სადაც რუსეთის ჯარის გასვლის შემდეგ, მოკლული და ნაწამები მშვიდობიანი მოქალაქეების ცხედრები იქნა ნაპოვნი.

"მე წარმოვიდგინე ჩემი ოჯახი ერთ-ერთ იმ სახლში, რომელიც ახლა დანგრეული და დამწვარია. მე ვხედავ, თუ როგორ შველიან თავს გაქცევით პანიკაში მყოფი ჩემი შვილიშვილები. ომი - ეს არის 21-ე საუკუნის აბსურდი. ომი - ეს არის ბოროტება, ის არავითარ შემთხვევაში არ უნდა იყოს მისაღები 21-ე საუკუნეში", - განაცხადა გაეროს გენერალურმა მდივანმა.

მან განაცხადა, რომ მხარს უჭერს საერთაშორისო ტრიბუნალის მიერ უკრაინაში ჩადენილი სამხედრო დანაშაულის გამოძიებას.

"მე სრულად ვუჭერ მხარს სისხლის სამართლის საერთაშორისო სასამართლოს (ICC) და მოვუწოდებ რუსეთის ფედერაციას, დათანხმდეს, ითანამშრომლოს ICC-თან", - განაცხადა გაეროს გენერალურმა მდივანმა.

გუტერეში დღეს უკრაინის პრეზიდენტს, ვოლოდიმირ ზელენსკის შეხვდება.