რუსეთი ახორციელებს მოსახლეობის უმოწყალო ხოცვა ჟლეტას და მე მგონი, დღეს იმაზე საუბარი, რომ უკრაინელების მხრიდან რაღაც საწყენია, არ არის სწორი, - ამის შესახებ საქართველოს პარლამენტის ვიცე-სპიკერმა, ლევან იოსელიანმა უკრაინის უმაღლესი რადას თავმჯდომარის მიერ ბუჩაში მიწვევაზე შალვა პაპუაშვილის განცხადებოს კომენტირებისას აღნიშნა.

„ვფიქრობ, როგორც არ უნდა იყოს საკითხი, ვინ ვისზეც არ უნდა იყოს ნაწყენი, როგორც ვინმეს არ უნდა მოსწონდეს უკრაინული მხარის განცხადება, დღეს ეს ქვეყანა არის ომში და ეს ქვეყანა ფაქტობრივად იცლება სისხლისგან. რუსეთი ახორციელებს მოსახლეობის უმოწყალო ხოცვა ჟლეტას და მე მგონი, დღეს იმაზე საუბარი, რომ უკრაინელების მხრიდან რაღაც საწყენია, არ არის სწორი. ამიტომ დღეს უკრაინას გვერდში უნდა ვედგეთ პოლიტიკურ, ადამიანურ დონეზე, რაც შეგვიძლია, ყველამ ყველაფერი გავაკეთოთ“, – განაცხადა იოსელიანმა.

შალვა პაპუაშვილმა უკრაინის რადას ბუჩაში მიწვევის საპასუხოდ განაცხადა, რომ „საქართველოში მეორე ფრონტის გახსნის მოთხოვნის, დიპლომატიური დემარშების, კონტრაბანდაში უსაფუძვლო დადანაშაულების განუმარტებლობის ფონზე, უკრაინაში ოფიციალური მიწვევა არასათანადოდ ჩანს“.