რუსეთის შეიარაღებული ძალების რადიაციული, ქიმიური და ბიოლოგიური დაცვის ჯარების ხელმძღვანელი იგორ კირილოვი ამტკიცებს, რომ „რუსეთის ფედერაციის ტერიტორიაზე რიგი სუბიექტებისკენ შეინიშნება საქართველოდან კოღოების სხვადასხვა სახეობის გავრცელება, რომლებიც მანამდე მხოლოდ სამხრეთის ქვეყნებში იყო გავრცელებული“. როგორც რუსული პროპაგანდისტული მედია „ტასი“ წერს, ამის შესახებ რუსეთის თავდაცვის სამინისტროს წარმომადგენელმა გაეროს უსაფრთხოების საბჭოს არაფორმალურ სხდომაზე განაცხადა.  

 „ლუგარის სახელობის ცენტრის დისლოკაციის რეგიონში (თბილისის) განსაკუთრებით უარესდება სიტუაცია დაავადებების მხრივ, რომლებსაც გადამტანი მწერები ავრცელებენ... ევროპის დაავადებათა კონტროლისა და პროფილაქტიკის ცენტრის ვებგვერდზე გამოქვეყნებული მონაცემების თანახმად, სხვადასხვა სახეობის კოღოების, რომლებიც მანამდე მხოლოდ სამხრეთში გვხვდებოდა, გავრცელების არეალი ინაცვლებს საქართველოდან რუსეთის ფედერაციის რიგი სუბიექტებისკენ“, - თქვა კირილოვმა.

ანალოგიური განცხადება იგორ კირილოვმა 2018 წელსაც გააკეთა.

მრავალი წლის განმავლობაში რუსეთი თბილისის ლუგარის ლაბორატორიას ადანაშაულებს ღორის აფრიკული ჭირის გავრცელებაში. კირილოვის თქმით, ღორის აფრიკული ჭირის გავრცელება საქართველოდან რუსეთის ფედერაციაში, ევროპის ქვეყნებსა და ჩინეთში 2007 წლიდან ფიქსირდება.

„აღნიშნული ქვეყნების ტერიტორიაზე ცხოველთა ნიმუშებში აღმოჩენილია ღორის აფრიკული ჭირის ვირუსის შტამები, რომლებიც იდენტურია „საქართველო-2007“-ის შტამის. დიდი ალბათობით შევძლებთ დამტკიცებას, რომ ღორის აფრიკული ჭირის შტამი, რომელიც მაღალი გადამდებობით გამოირჩევა, შექმნილია პენტაგონის დაქვემდებარებაში არსებულ ბიოლაბორატორიაში“, - განაცხადა კირილოვმა.

მოსკოვმა ლუგარის ლაბორატორიის საწინააღმდეგო დეზინფორმაციული კაპმანია უკრაინაში შეჭრის შემდეგ გააქტიურა. ამასთან, რუსეთის წარმომადგენლების თქმით, უკრაინაში ანალოგიურ ობიექტებში მიმდინარეობდა ბიოლოგიური იარაღის შემუშავება.

რუსეთის თავდაცვის სამინისტროს ოფიციალურმა წარმომადგენელმა იგორ კოშანეკოვმა განაცხადა, რომ აშშ-ის მიერ შექმნილ და დაფინანსებულ უკრაინის ბიოლაბორატორიებში მრავალი წლის განმავლობაში ხორციელდებოდა საიდუმლო პროექტი ღამურებიდან ადამიანებისთვის დაავადებების გადაცემის გზების შესასწავლად.

აშს-ის სახელმწიფო დეპარტამენტი აცხადებს, რომ დეზინფორმაციის მეშვეობით, რუსეთი ცდილობს უკრაინაში თავისი სასტიკი ქმედებების გამართლებას.

 „როგორც არაერთხელ აღვნიშნეთ, რუსეთი იგონებს ცრუ საბაბს, რათა უკრაინაში თავისი შემაძრწუნებელი ქმედებები გაამართლოს“, - განაცხადა სახელმწიფო დეპარტამენტის პრესსპიკერმა ნედ პრაისმა.