უკრაინის პრეზიდენტი ვოლოდიმირ ზელენსკი ბუჩაში ჩავიდა. ის ადგილობრივ მოსახლეობას შეხვდა და განაცხადა, რომ რუსეთმა უკრაინაში გენოციდი განახორციელა და ომის დანაშაული ჩაიდინა. ინფორმაციას BBC ავრცელებს.

BBC-ის ჟურნალისტის შეკითხვაზე მიიჩნევს თუ არა ის კიდევ შესაძლებლად რუსეთთან სამშვიდობო მოლაპარაკებების გაგრძელებას, ზელენსკიმ განაცხადა: დიახ, იმიტომ რომ უკრაინამ უნდა მოიპოვოს მშვიდობა, ჩვენ 21-ე საუკუნის ვეროპაში ვართ. გავაგრძელებთ დიპლომატიურ და სამხედრო ძალისხმევას“.

შეგახსენებთ, კიევის ოლქის ქალაქების გათავისუფლების შემდეგ უკრაინელ სამხედროებს უმძიმესი ვითარება დახვდათ. ქალაქების ქუჩებში მიმოფანტული იყო რუსი ოკუპანტების მიერ დახოცილი მშვიდობიანი მოქალაქეების ცხედრები.

რუსი სამხედროები წამებით ხოცავდნენ მშვიდობიან მოქალაქეებს, აუპატიურებდნენ ქალებს. ქალაქ ბუჩის მერის განხადებით, უკვე დაკრძალეს 300-მდე ცხედარი, თუმცა ქალაქში უამრავი ცხედარი რჩება. უმძიმესი კადრები სხვადასხვა მედიასაშუალებამ გაავრცელა, რომლებიც გათავისუფლებულ დასახლებებში იმყოფებოდნენ.

საერთაშორისო უფლებადამცველი ორგანიზაცია Human Rights Watch-ის განცხადებით, მათ აქვთ მტკიცებულებები რუსეთის არმიის მიერ უკრაინაში ჩადენილი ომის დანაშაულებისა.

ბუჩაში რუსეთის მიერ დატრიალებული სისასტიკე მკაცრად დაგმეს დასავლეთის ლიდერებმა.

უკრაინის გენერალური პროკურორის ირინა ვენედიქტოვას განცხადებით, ოკუპანტებისაგან გათავისუფლებული კიევის ოლქის დასახლებებში, რუსი სამხედროების მიერ დახოცილი 410 ადამიანის ცხედარი იპოვეს. ზოგიერთ მათგანს ზურგსუკან ხელები აქვს შეკრული და თავში აქვთ ნასროლი. ცხედრებზე ჩანს წამების კვალი.  

რუსეთის თავდაცვის სამინისტრომ უარყოფ რუსი სამხედროების მიერ ბუჩაში მშვიდობიანი მოსახლეობის მასობრივი ხოცვა-ჟლეტა.

აგრესორი ქვეყნის თავდაცვის უწყების მტკიცებით, ფოტო-ვიდეო კადრები, სადაც ნაჩვენებია მოკლული მშვიდობიანი მოსახლეობის ცხედრები არის "კიევის რეჟიმის მორიგი პროვოკაცია" და "კიდევ ერთი პროდუქტი დასავლური მედიისთვის".