ნეიტრალიტეტი არის თემა, რომელიც სახელმწიფოს ინტერესებს ეწინააღმდეგება, - ამის შესახებ „სტრატეგია აღმაშენებლის“ ლიდერმა გიორგი ვაშაძემ განაცხადა. მისი თქმით, ნებისმიერი პოლიტიკოსი, რომელიც ამბობს, რომ საქართველოს ნეიტრალიტეტი გადაარჩენს, დაკავშირებულია რუსულ სცენართან.

"გარკვეული ჯგუფები ამ თემაზე ორკესტრირებულად საუბრობენ და სამწუხაროდ, იმ გეოპოლიტიკურ ვითარებას ვერ იაზრებენ, რომელიც დღეს ქვეყანაშია. მცდარია დამოკიდებულება, რომ უკრაინა ნეიტრალიტეტის გზით მიდის. უკრაინასთან საუბარია უსაფრთხოებისა და სამხედრო გარანტიებზე, ასევე უსაფრთხოების ახალი ჩარჩოს შექმნაზე. ასეთი სახის უსაფრთხოების ჩარჩო ნატო-ში ინტეგრაციამდე ძალიან კარგი იქნებოდა საქართველოსთვისაც.

ნებისმიერი პოლიტიკოსი, რომელიც ამბობს, რომ საქართველოს ნეიტრალიტეტი გადაარჩენს, დაკავშირებულია რუსულ სცენართან. ჩემი ქვეყნისთვის ნეიტრალიტეტი კატეგორიულად მიუღებელია, რადგან ზუსტად ვიცი, რომ ეს არ არის საქართველოს გადარჩენის გზა, ეს არის საქართველოს დესუვერენიზაციის გზა, ანუ, დამოუკიდებლობის დაკარგვის გზა, რაც ყველას უნდა გვესმოდეს. მზად უნდა ვიყოთ, რომ ნატო-ში გაწევრიანებამდე შეიძლება უსაფრთხოების გარკვეულ მოდელებში მონაწილეობის შანსი გაგვიჩნდეს. ოღონდ, ეს არის ნატო-ში გაწევრიანებამდე და ეს არ არის ნატო-ს წევრობის სანაცვლო მექანიზმი“, – განაცხადა გიორგი ვაშაძემ.