„იმ მანიპულაციას, რითაც ახლა თქვენ ხართ დაკავებული, აქვს ერთადერთი მიზანი - საქართველო ჩაითრიოთ შეიარაღებულ კონფლიქტში. არავის მივცემთ საშუალებას, რომ სულ ცოტა რისკიც კი გაჩნდეს, რომ საქართველო იქნას ჩათრეული სამხედრო კონფლიქტში. ამას გეუბნებით მე, როგორც პარლამენტის თავმჯდომარე“,- ამის შესახებ საქართველოს პარლამენტის თავმჯდომარემ ბიუროს სხდომაზე განაცხადა.

პარლამენტის თავმჯდომარემ ხაზგასმით აღნიშნა, რომ საქართველო მყარად უჭერს მხარს უკრაინას და ამ მიმართულებით, საერთაშორისო ფორმატებში მნიშვნელოვანი ნაბიჯები გადადგა.

შალვა პაპუაშვილი ფრაქცია „ნაციონალური მოძრაობის“ თავმჯდომარის ხატია დეკანოიძის განცხადებას გამოეხმაურა.

„ქალბატონო ხატია, თქვენი გამართული რუსულით მსოფლიოსთვის ნათქვამი, რომ ხელისუფლების მოცილებით ხართ დაკავებული, საუბრობს ყველაფერზე, საერთოდ რა დამოკიდებულება გაქვთ საქართველოს - თქვენი პირველი სამშობლოს მიმართ, უკრაინის - თქვენი მეორე სამშობლოს მიმართ და საერთოდ, ადამიანობის მიმართ. იმ მანიპულაციას, რითაც ახლა ხართ დაკავებული, აქვს ერთადერთი მიზანი: საქართველო ჩაითრიოთ შეიარაღებულ კონფლიქტში. ამას მოვუწოდებთ ხელისუფლება, რომ არ მივცემთ არავის იმის საშუალებას, სულ ცოტა რისკიც კი გაჩნდეს, რომ საქართველო იქნას ჩათრეული სამხედრო კონფლიქტში. ამას გეუბნებით მე, როგორც პარლამენტის თავმჯდომარე, მათ შორის, იმ ინფორმაციაზე დაყრდნობით, რაც გვაქვს, რასაც ვუყურებთ. საქართველო არის აბსოლუტურად მყარი თავის პოლიტიკურ მხარდაჭერაში უკრაინის მიმართ, ჩვენ რამდენიმე დღის წინ სისხლის სამართლის საერთაშორისო სასამართლოს სხვა ქვეყნებთან ერთად მივმართეთ რუსეთის წინააღმდეგ სარჩელით, მხარი დავუჭირეთ რუსეთის გარიცხვას ევროსაბჭოდან, მხარი დავუჭირეთ გაეროს რეზოლუციას, ვიყავით ინიციატორები იმ განცხადებებისა, სადაც თქვენ მონაწილეობაც კი არ მიიღეთ, როგორც დელეგაციის წევრებმა და თქვენ ხართ დაკავებული სოციალურ ქსელში ტექსტების აკრეფით, ხალხის აჟიტირებით სხვადასხვა თემებით, ნაცვლად იმისა, რომ გამოავლინოთ ნამდვილი სოლიდარობა უკრაინელი ხალხის მიმართ“,- განაცხადა შალვა პაპუაშვილმა.