"უკრაინაში კონფლიქტის საბაბით, ნატო შეეცდება თავისი რიგებში ახალი ქვეყნები მოიზიდოს", - ასე ეხმიანება რუსეთის საგარეო საქმეთა სამინისტროს სპიკერი მარია ზახაროვა ნატოს გენერალური მდივნის, იენს სტოლტენბერგის განცხადებას, საქართველოსა და ბოსნია ჰერცეგოვინისთვის მეტი დახმარების გაწევის თაობაზე.

"გაკვირვებას იწვევს ასევე ნატო-ს "სურვილი" დაეხმაროს ბოსნია ჰერცოგოვინასა და საქართველოს უკრაინაში ვითარების ფონზე, რომელიც მათი თქმით, შესაძლოა, ამ ქვეყნებშიც გავრცელდეს... ცხადია, რომ ნატო გამოიყენებს "უკრაინაში ომს" საბაბად თავის რიგებში ახალი და ახალი ქვეყნების შესათრევად. ალიანსის მუშაობა თავისი გავლენების სფეროს გასაფართოებლად, გრძელდება", - განაცხადა ზახაროვამ.

შეგახსენებთ, 4 მარტს, ბრიუსელში ჩრდილოატლანტიკური საბჭოს საგანგებო შეხვედრის დასრულების შემდეგ იენს სტოლტენბერგმა მედიასთან საუბრისას განაცხადა, მოკავშირეებმა ასევე იმსჯელეს ნატოს პარტნიორი ქვეყნების, მათ შორის საქართველოსა და ბოსნია-ჰერცეგოვინის გაძლიერების საკითხზეც.

"ნატო მხარდაჭერას უწევს საქართველოს, ბოსნია-ჰერცეგოვინას და სხვა პარტნიორებს მრავალი წლის განმავლობაში. ჩვენ ვეხმარებით მათ თავდაცვითი შესაძლებლობების გაძლიერებაში, რეფორმებში მათი თავდაცვისა და უსაფრთხოების ინსტიტუტების გაძლიერებაში. ჩვენ ასევე გვაქვს საწვრთნელი ცენტრი საქართველოში. გვაქვს საერთო სწავლებები და სხვადასხვა აქტივობა სხვადასხვა პარტნიორ ქვეყანასთან. ჩვენ ჯერ საბოლოო გადაწყვეტილებები არ მიგვიღია, ეს არის ფართო შეთანხმება, რომ ჩვენ მეტი უნდა გავაკეთოთ ამ ქვეყნების დასაცავად", - განაცხადა სტოლტენბერგმა.