სადეპუტატო მანდატი თუ შემიწყდება, ეს იქნება პოლიტიკური დევნის ახალი ტალღა, ვიმოქმედებ შესაბამისად, - ამის შესახებ „ლელოს“ ერთ-ერთმა ლიდერმა, ბადრი ჯაფარიძემ განაცხადა. მისი თქმით, სამართლებრივად არანაირი საფუძველი არ არსებობს იმისა, რომ მას პარლამენტმა სადეპუტატო უფლებამოსილება შეუწყვიტოს.

„ანალოგიური სისულელე დღევანდელ სასამართლოსაც კი გაუჭირდება, მოძებნოს. მე ამას ვუწოდებ იმ გადაწყვეტილებას, რომელიც მიიღო მოსამართლემ. თავისთავად ეს გაგრძელებაა იმ პოლიტიკური დევნის, რომლის ობიექტებიც ვიყავით მე და მამუკა ხაზარაძე ბოლო 3 წლის განმავლობაში. დაველოდოთ „ქართული ოცნების“ გადაწყვეტილებას. ნათელია, რომ სამართლებრივად არანაირი საფუძველი არ არსებობს. დაველოდოთ, რას გადაწყვეტს „ქართული ოცნება“.

ჩემი მანდატი თუ შეწყდება, ეს იქნება პოლიტიკური დევნის ახალი ტალღა, ვიმოქმედებ შესაბამისად. წინასწარ რაიმე პროგნოზის გაკეთება არ მინდა. სამი წელიწადია, მიმდინარეობს სასამართლო დევნა, ესეც ამ დევნის გაგრძელებაა. სამწუხაროდ, საპროცედურო კომიტეტის გადაწყვეტილებაც არის იგივე. დაველოდოთ, თვითონ სხდომაზე რა გადაწყვეტილება იქნება მიღებული“, – განაცხადა ბადრი ჯაფარიძემ.

შეგახსენებთ, საპროცედურო საკითხთა კომიტეტმა მიზანშეწონილად მიიჩნია, რომ ბადრი ჯაფარიძეს სადეპუტატო უფლებამოსილება შეუწყდეს. კომიტეტის დასკვნა პლენარულ სხდომას წარედგინება. გადაწყვეტილების მიღება პლენარულ სხდომაზე დამსწრეთა უმრავლესობით მოხდება.