ჯანდაცვის მინისტრის ზურაბ აზარაშვილის განცხადებით, რომ სოციალური მომსახურების სააგენტოს მიერ სოციალური აგენტებისთვის შეთავაზებული ანაზღაურება [რომელიც თებერვლიდან ამოქმედდება] მათი ფუნქციებისა და დატვირთულობის გათვალისწინებით, "ადეკვატურია".

ზურაბ აზარაშვილი ამ კომენტარით გამოეხმაურა ჯანდაცვის სამინისტროსთან მიმდინარე სოციალური აგენტების პროტესტს, რომლებიც არ ეთანმხმებიან შეთავაზებული ხელფასის ოდენობას.

"სოციალურ აგენტებს რაც შეეხება, მათი ხელფასის განხილვა მიმდინარეობდა რამდენიმე თვის განმავლობაში. მათი ფუნქციებიდან, დატვირთულობიდან და იმ სამუშაო დღიდან გამომდინარე, წინა კვირაში მივიღეთ შესაბამისი გადაწყვეტილება და ზოგიერთ შემთხვევაში 60%-იანი მატებაც არის ხელფასის. ამის გარდა, მათ შეუძლიათ, გამომუშავებით მიიღონ შემოსავალი და ისიც ყოველ შევსებულ დეკლარაციაზე 6-დან 10 ლარამდე გავზარდეთ. ჯამურად, შეუძლიათ ფიქსირებულზე 2-ჯერ მეტი ხელფასი აიღონ. აქედან გამომდინარე, ვფიქრობთ, რომ დღევანდელი რეალობისთვის, მათი დატვირთულობიდან გამომდინარე, ეს ხელფასი არის ადეკვატური", - თქვა ზურაბ აზარაშვილმა.

შეგახსენებთ, სოციალური მომსახურების სააგენტოში დასაქმებული სოციალური აგენტები დღეს გაიფიცნენ. ისინი ჯანდაცვის სამინისტროს შენობასთან საპროტესტო აქციას მართავენ.

გუშინ სოციალური მომსახურების სააგენტომ განცხადება გაავრცელა, სადაც ნათქვამია, რომ სოციალური აგენტების და სხვა თანამშრომელების შრომის ანაზღაურება თებერვლიდან გაიზრდება.

უწყების ინფორმაციით, სოციალური აგენტების ფიქსირებული ანაზღაურება 60%-მდე იზრდება. კერძოდ, 250 ლარის ნაცვლად 400 ლარი გახდება, უფრო სოციალური აგენტების ანაზღაურება 550 ლარის ნაცვლად 700 ლარი გახდება. ასევე, ერთ შევსებულ დეკლარაციაზე სოციალური აგენტების 6-ის ნაცვლად 10 ლარს მიიღებენ.