ყაზახეთის პრეზიდენტის ყასიმ ჟომართ-თოყაევის განცხაედებით, საპროტესტო მღელვარების მეექვსე დღეს, ქვეყნის ყველა რეგიონში კონსტიტუციური წესრიგი ძირითადად აღდგენილია.

თოყაევის თქმით, ადგილობრივი ხელისუფლება აკონტროლებს ვითარებას.

პრეზიდეტნმა საპროტესტო აქციების მონაწილეეობს კიდევ ერთხელ უწოდა ტერორისტები.

"ტერორისტები აგრძელებენ იარაღის გამოყენებას და მოქალაქეთა საკუთრების დაზიანებას. ამიტომ კონტრტერორისტული მოქმედებები უნდა გაგრძელდეს ტერორისტთა სრულ განადგურებამდე", - თქვა თოყაევმა.

ყაზახეთს პრეზიდენტმა ასევე განაცხადა, რომ არეულობის პროვოცირების შემთხვევაში, უსაფრთხოების ძალებს ცეცხლის გაუფრთხილებლად გახნის მითითება მისცა და დასძინა, "ისინი, ვინც ნებაყოფლობით არ ჩაბარდებიან, განადგურდებიან".

ყასიმ ჟომართ-თოყაევმა მადლობა გადაუხადა კოლექტიური უსაფრთხოების ხელშეკრულების ორგანიზაციას, რადგან მისი თხოვნით, სამშვიდობები ქვეყანაში ჩავიდნენ და ვითარების დასტაბილურებაში ეხმარებიან.

თოყაევმა აღნიშნა, რომ სამშვიდობოები ყაზახეთში დროებით დარჩებიან და განსაკუთრებული მადლიერება გამოხატა რუსეთის პრეზიდენტ პუტინის მიმართ.

"განსაკუთრებულ მადლიერებას ვუძღვნი რუსეთის პრეზიდენტ ვლადიმირ პუტინს. ის ძალიან სწრაფად და რაც მთავარია, მეგობრულად გამოეხმაურა ჩემს თხოვნას“, - განაცხადა თოყაევმა.

მან ასევე მადლობა გადაუხადა დახმარებისთვის, ჩინეთის, უზბეკეთის, სომხეთის, ბელარუსის, ყირგიზეთის, ტაჯიკეთისა და თურქეთის ლიდერებს.

შეგახსენებთ, ყაზახეთი საპროტესტო ტალღამ მოიცვა. მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.

4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა. იუწყებიან, რომ შეტაკებებს ათეულობით დემონსტრანტი ემსხვერპლა, დაღუპულია 10-ზე მეტი პოლიციელი.

პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებული აგრესიის აქტად შეაფასა. ამასთან, თოყაევმა კოლექტიური უსაფრთოების ხელშეკრულების ორგანიზაციას დახმარების თხოვნით მიმართა. თოყაევმა ორგანიზაციას სამშვიდობო კონტიგენტის დროებით განთავსება სთხოვა, რაზედაც თანხმობა მიიღო. რუსეთმა მყისიერად უპასუხა ყაზახეთის პრეზიდენტის თხოვნას და სამშვიდობო ოპერაციის ეგიდით, ყაზახეთში სამხედროები გადაისროლა.

ქვეყნის მთელ ტერიტორიაზე გამოცხადებულია საგანგებო მდგომარეობა.