ბელარუსის პრეზიდენტმა ალიაქსანდრ ლუკაშენკამ განაცხადა, რომ არ შეიძლება უკრაინის მსგავსად ყაზახეთი ამერიკასა და ნატო-ს საჩუქრად გადასცენ.  „ყაზახეთის დათმობა არ შეიძლება, ისევე როგორც უკრაიანა, ის საჩუქარი იქნება ამერიკისა და ნატო-სთვის“ - განაცხადა ბელარუსის პრეზიდენტმა.

 „ჩვენ შესანიშნავად გვესმის, რომ ყაზახეთის დათმობა არ შეიძლება. ეს იქნება ისეთი საჩუქარი... როგორც უკრაინა ამერიკისა და ნატო-სთვის. იქაც და იქაც“, - განაცხადა ლუკაშენკამ მინსკში. მისი გამოსვლა  Telegram-არხზე ვრცელდება.

მან განმარტა გადაწყვეტილება ყაზახეთში ბელარუსი სამშვიდობოების გაგზავნის შესახებ, რომლებიც კოლექტიური უსაფრთხოების ხელშეკრულების ორანგანიზაციის ქვეყნების კონტიგენტის შემადგენლობაში არიან.

 კოლექტიური უსაფრთხოების ხელშეკრულების ორგანიზაციის საბჭომ, რომელსაც ამ დროისთვის, როტაციის პრინციპის გათვალისწინებით, სომხეთის პრემიერ-მინისტრი ნიკოლ ფაშინიანი თავმჯდომარეობს, ყაზახეთში სამშვიდობო ძალები გაგზავნა.

ორგანიზაცია 1992 წელს, სსრკ-ს დაშლისთანავე შეიქმნა. საქართველომ, აზერბაიჯანმა და უზბეკეთმა კოლექტიური უსაფრთხოების ხელშეკრულების ორგანიზაციის რიგები ძალიან მალე დატოვეს და ახლა მის ექვს წევრს – სომხეთი, ბელარუსი,ყაზახეთი, ყირგიზეთი, რუსეთი და ტაჯიკეთი წარმოადგენენ.

ყაზახეთის ქალაქებში მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო.

მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.

4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა. ალმათში დემონსტრანტებმა დაიკავეს და გადაწვეს ქალაქის ადმინისტრაციის შენობა.

გარდა ამისა, დემონსტრანტებმა ცეცხლს მისცეს ალმათში მდებარე მმართველი პარტია Nur Otan-ის ერთ-ერთ ოფისი და გენერალური პროკურატურის შენობა.
არიან დაღუპულები და დაშავებულები, როგორც დემონსტრანტთა, ასევე უსაფრთხოების ძალების მხრიდან.

მასშტაბური საპროტესტო აქციების ფონზე, ყაზახეთის მთავრობა გადადგა. ქვეყნის მთელ ტერიტორიაზე გამოცხადდა საგანგებო მდგომარეობა.