ევროკომისიამ, ევროპის კავშირის მთავარმა აღმასრულებელმა ორგანომ, რუსეთს ყაზახეთის სუვერენიტეტის პატივისცემსკენ მოუწოდა.

ამ გამაფრთხილებელი განცხადების ფონია, ყაზახეთში, ვითარების დასტაბილურების მოტივით, კოლექტიური უსაფრთხოების ორგანიზაციის ეგიდით, რუსი სამხედროების გადასროლა.

ამასთან, ევროკომისია ძალადობისა და დაპირისპირების შეწყვეტის მოწოდებით გამოვიდა.

"ძალადობას წერტილი უნდა დაესვას. მოვუწოდებთ ყველა მხარეს თავშეკავებისა და სიტუაციის მშვიდობიანი გზით მოგვარებისკენ. ნათელია, რომ ევროკავშირი მზად არის და ისურვებს, რომ მხარი დაუჭიროს დიალოგის წამოწყებას ქვეყანაში", - ნათქვამია ევროკომისიის პრესსპიკერის განცხადებაში.

შეგახსენებთ, ყაზახეთი საპროტესტო ტალღამ მოიცვა. მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო.

მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.

4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა. იუწყებიან, რომ შეტაკებებს ათეულობით დემონსტრანტი ემსხვერპლა, დაღუპულია 10-ზე მეტი პოლიციელი.

პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებული აგრესიის აქტად შეაფასა. ამასთან, თოყაევმა კოლექტიური უსაფრთოების ხელშეკრულების ორგანიზაციას დახმარების თხოვნით მიმართა, რაზედაც თანხმობა მიიღო. რუსეთმა უკვე დაიწყო, სამშვიდობო ოპერაციის ეგიდით, ყაზახეთში სამხედროების გადასროლა.

ქვეყნის მთელ ტერიტორიაზე გამოცხადდა საგანგებო მდგომარეობა.