ყაზახეთის ქალაქ ალმათის პოლიციის დეპარტამენტის ოფიციალური წარმომადგენელი ადასტურებს, რომ 6 იანვარს სამართლადმაცველების მხრიდან გახსნილ ცეცხლს საპროტეტსო აქციის რამდენიმე მონაწილე ემსხვერპლა. მისი თქმით, მიმდინარეობს გარდაცვლილების იდენტიფიცირება.

როგორც პოლიციის წარმომადგენელმა განაცხადა, აქციის მონაწილეები პოლიციის შენობაში შეჭრას ცდილობდნენ. მისივე თქმით, დემონსტრანტები ძარცვავდნენ ქალაქში მდებარე იარაღის მაღაზიებს.

ალმათში გვიან ღამით ხელისუფლებამ, როგორც თავად აცხადებს, ანტიტერორისტული ოპერაცია დაიწყო.

ყაზახეთის ქალაქებში მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო.

მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.

4 და 5 იანვარს ვითარება განსაკუთრებით დაიძაბა ქალაქ ალმათიში, სადაც დემონსტრანტებისა და უსაფრთხოების ძალების შეტაკებები გაიმართა. ალმათიში დემონსტრანტებმა დაიკავეს და გადაწვეს ქალაქის ადმინისტრაციის შენობა.

გარდა ამისა, დემონსტრანტებმა ცეცხლს მისცეს ალმათში მდებარე მმართველი პარტია Nur Otan-ის ერთ-ერთ ოფისი და გენერალური პროკურატურის შენობა.

მასშტაბური საპროტესტო აქციების ფონზე, ყაზახეთის მთავრობა გადადგა. ქვეყნის მთელ ტერიტორიაზე გამოცხადდა საგანგებო მდგომარეობა.

პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათ თავდასხმას ყაზახეთზე განხორციელებული აგრესიის აქტი უწოდა. ამასთან, თოყაევმა კოლექტიური უსაფრთოების ხელშეკრულების ორგანიზაციას დახმარების თხოვნით მიმართა, რაზედაც თანხმობა მიიღო. რუსეთმა უკვე დაიწყო, სამშვიდობო ოპერაციის ეგიდით, ყაზახეთში სამხედროების გადასროლა.