შეერთებული შტატების სურსათისა და მედიკამენტების ადმინისტრაციამ (FDA) ფარმაცევტული კომპანანია Pfizer-ის მიერ წარმოებული კოვიდ-19-ის სამკურნალო აბები გადაუდებელი გამოყენებისთვის დაამტკიცა.

პრეპარატი Paxlovid პირველია, რომელიც სურსათისა და მედიკამენტების ადმინისტრაციამ კოვიდ-19-ის სამკურნალოდ დაამტკიცა.

გავრცელებული ინფორმაციით, პრეპარატის მიღება ნებადართულია მხოლოდ ექიმის დანიშნულებით. მედიკამენტის მიღება დიაგნოზის დადასტურებისა და სიმპტომების დაწყებიდან ხუთი დღის განმავლობაში უნდა მოხდეს.

ფარმაცევტული კომპანია Pfizer-ის განცხადებით, მის მიერ შემუშავებული კორონავირუსის საწინააღმდეგო ექსპერიმენტული (ორალური) აბები ჰოსპიტალიზაციის ან გარდაცვალების რისკს 89%-ით ამცირებს.

შეგახსენებთ, ნოემბრის დასაწყისში, დიდმა ბრიტანეთმა კოვიდ-19-ის სამკურნალო პირველი ანტივირუსული პრეპარატი დაამტკიცა. პრეპარატი მოლნუპირავირი ფარმაცევტული კომპანია Merck-ის მიერ არის შემუშავებული.

პრეპარატი სახლის პირობებში მკურნალობისთვის არის განკუთვნილი და მისი მიღება, ექიმის დანიშნულებით, ინფიცირების შედარებით მსუბუქად მიმდინარეობის დროს იქნება შესაძლებელი.

18 დეკემბერს პრეპარატი უკვე დაენიშნა პირველ ბრიტანელ პაციენტს.