რუსეთმა ბელარუსში სტრატეგიული ბომბდამშენები ტუ-22მ3 გაგზავნა დასავლეთ საზღვრის გასწვრივ რეგიონების ერთობლივი პატრულირებისათვის. ბელარუსის თავდაცვის სამინისტროში განაცხადეს, რომ რუსი სამხედროები მოქმედებენ შერეულ ტაქტიკურ ჯგუფში, რომელშიც ასევე შედის რუსეთისა და ბელარუსის მრავალფუნქციური გამანადგურებლები სუ-30სმ.

თავის მხრივ რუსეთის თავდაცვის სამინისტრო იუწყება, რომ საჰაერო-კოსმოსური ძალების ორმა ბომბდამშენმა ტუ-22მ3-მა  შეასრულა პატრულირება ბელარუსის საჰაერო სივრცეში.

ცოტა ხნით ადრე მინსკში განაცხადეს, რომ ბელარუსის საზღვრის გასწვრივ ორჯერ გაიზარდა ნატო-ს ქვეყნების შეიარაღებული ძალების ფრენების რაოდენობა, მათ შორის უკრაინის ტერიტორიაზეც.

ბელარუსსა და ევროკავშირს შორის ურთიერთობა მნიშვნელოვნად დაიძაბა 2020 წლის ბელარუსის პრეზიდენტის არჩევნების შემდეგ. ქვეყნის საარჩევნო ცენტრალურმა კომისიამ გამარჯვებულად ალიაქსანდრ ლუკაშენკა გამოაცხადა. დასაველთი არ აღიარებს მის ლეგიტიმურობას. 2021 წლის ზაფხულიდან გრძელდება კონფლიქტი, რომელიც უკავშირდება ლუკაშენკას რეჟიმის მიერ ახლო აღმოსავლეთიდან ჩასული მიგრანტების ევროკავშირზე ზეწოლის ინსტრუმენტად გამოყენებას.

დასავლეთი ასევე შეშფოთებულია უკრაინის საზღვართან რუსული ჯარების კონცენტრაციით და შიშობს, რომ  რუსეთი უკრაინის წინააღმდეგ ომის დასაწყებად ემზადება.