ეს არის სამედიცინო მანიპულაცია, ამით, შიმშილობის სტატუსი არ ირღვევა , - ასე ეხმიანება ცენტრ "ემპათიას" თავმჯდომარე მარიამ ჯიშკარიანი, "მთავარ არხთან" საუბრისას, სპეციალური პენიტენციური სამსახურის მიერ გავრცელებულ მიხეილ სააკაშვილის ვიდეოკადრებს.

ჯიშკარიანის თქმით, ამ კადრების გავრცელებით, პენიტენციურმა უწყებამ კანონმდებლობა დაარღვია.

"აღნიშნულ კადრების გავრცელებით, რა თქმა უნდა, დაირღვა პაციენტის უფლებები, პაციენტის უფლებების შესახებ საქართველოს კანონი, ასევე, საექიმო საქმიანობის შესახებ საქართველოს კანონი და გარდა ამისა, საერთაშორისო სტანდარტები. ეს გახლავთ, წამების საწინააღმდეგო ევროპული კომიტეტის დებულება, ციხეების ჯანდაცვასთან დაკავშირებით, რომლებითაც ნებისმიერი ვიზუალური თუ აუდიო მიყურადება არის კატეგორიულად დაუშვებელი სამედიცინო დაწესებულებაში, სამედიცინო მანიპულაციის ჩატარების დროს.

რაც შეეხება თვითონ რაც ვიხილეთ ეს არის სამედიცინო მანიპულაცია, ამით, რა თქმა უნდა, შიმშილობის სტატუსი ვერ ირღვევა და არ ირღვევა. სამედიცინო პერსონალის მხრიდან აქ არის უფლებამოსილების გადამეტება, მთელი რიგი კანონდარღვევა. თუ არ გაემიჯნება ციხის სამედიცინო პერსონალი იუსტიციის მინისტრისა და პენიტენციური სამსახურის განცხადებებს, შესაბამისად, ისინი თანამონაწილეები ხდებიან დანაშაულში", - ამბობს მარიამ ჯიშკარიანი.

შეგახსენებთ, სპეციალურმა პენიტენციურმა სამსახურმა გაავრცელა ვიდეო, სადაც მათივე ცნობით, მიხეილ სააკაშვილის მიერ საკვების მიღებაა ასახული.