გვაქვს ნაციონალური მოძრაობის ოფისიდან გამოტანილი ინფორმაცია იმასთან დაკავშირებით, რომ სააკაშვილის ერთ-ერთი გეგმა არის რაღაც სიმულაცია, მათ შორის იმის, რომ შეუძლოდ არის და ა.შ., - ამის შესახებ პარტია „ქართული ოცნების“ თავმჯდომარემ, ირაკლი კობახიძემ თიანეთში ჟურნალისტებს განუცხადა.

„ყველა დაიღალა ამ სპეკულაციებით, სპეკულაციები მოიმატებს შემდეგი 5-6 დღის განმავლობაში, რაც უფრო მეტად მივუახლოვდებით არჩევნებს. ვიცით, გვაქვს შიგნიდან, პარტიის ოფისიდან გამოტანილი ინფორმაცია იმასთან დაკავშირებით, რომ სააკაშვილის ერთ-ერთი გეგმა არის რაღაც სიმულაცია, მათ შორის იმის, რომ შეუძლოდ არის და ა.შ. არჩევნებამდე ჩვენ რაღაც კლოუნადის მომსწრენი ვიქნებით, თუმცა, საბოლოო ჯამში, ალბათ ყველა დაიღალა ამით. 30 ოქტომბერს არჩევნების მეორე ტური დასრულდება. შემდეგ თავიდან ბოლომდე უნდა გადავერთოთ სხვა რეჟიმზე. ყველა უნდა შეეჩვიოს, რომ მიხეილ სააკაშვილი არის ერთ-ერთი პატიმარი და თან პატიმარი, რომელსაც უმძიმესი, სხვებზე ბევრად მძიმე დანაშაულები აქვს ჩადენილი. აქედან გამომდინარე, ის იქნება იმ რეჟიმში, როგორ რეჟიმშიც არიან სხვა პატიმრები. ამას ყველა უნდა მიეჩვიოს და ეს საკითხი 30 ოქტომბრის შემდეგ დღის წესრიგიდან საბოლოოდ უნდა მოიხსნას“, – განაცხადა ირაკლი კობახიძემ.