დღეს საქართველოს მოსახლეობა აკეთებს ყველაფერს, რომ პანდემია კიდევ უფრო გაძლიერდეს და მეხუთე ტალღა იყოს უფრო მძიმე, ვიდრე მეოთხე. რას აკეთებს? კატეგორიულ უარს ამბობს ვაქცინაციაზე, -  ამის შესახებ ინფექციური პათოლოგიისა და შიდსის ცენტრის დირექტორმა, თენგიზ ცერცვაძემ განაცხადა.

"დღეში მხოლოდ 4-5 000 აცრა – ეს არის მიზერი, კატასტროფა. არც ერთი ცივილიზებული ქვეყანა ამას არ შვრება. ასევე, უარს ამბობს პირბადის ტარებაზე. საქართველოში 45%-ია პირბადის გამოყენების მაჩვენებელი, მაშინ, როცა ევროპაში 90-95%-ია. ამასთან, ქართველი კაცი ვერაფრით ვერ ამბობს უარს ხალხმრავალ შეკრებებზე, ქორწილებზე, ქელეხებზე იუბილეებზე და ახლა ამას ემატება პოლიტიკური მიტინგები. ვიყოთ რეალისტები და შევეცადოთ გავაუმჯობესოთ სიტუაცია იქ, სადაც ეს შესაძლებელია – ეს არის ვაქცინაცია და პირბადის ტარება“, – აღნიშნა ინფექციური პათოლოგიისა და შიდსის ცენტრის დირექტორმა.

მისი თქმით, მთავრობამ შეზღუდვები არ უნდა დააწესოს, თუმცა უნდა გამკაცრდეს არსებული რეგულაციების კონტროლი.

„შეზღუდვების შემოღება ყველაზე მარტივი გზაა, ზოგი ქვეყანა უკვე წავიდა ამაზე. ეს ძალიან მტკივნეული იქნება საქართველოს მოსახლეობისთვის, ამიტომ მგონია, რომ მთავრობა არ წავა შეზღუდვებზე. მიმაჩნია, რომ მთავრობა უნდა წავიდეს არა შეზღუდვებზე, რადგან ძლივს გაიხსნა ეკონომიკა და მოსახლეობამ ძლივს ამოისუნთქა, უბრუნდება ნორმალურ ცხოვრებას, არამედ უნდა წავიდეს არსებული რეგულაციების კონტროლის გაძლიერებაზე და აღსრულების კონტროლზე", - განაცხადა ცერცვაძემ.