ჩეჩნეთის ლიდერის რამზან კადიროვის 22 წლის ქალიშვილი აიშათ კადიროვა რესპუბლიკის კულტურის მინისტრი გახდა.

 „დარწმუნებული ვარ, ჩეჩნეთის რესპუბლიკის კულტურის მინისტრის საპასუხისმგებლო პოსტზე, აიშათი მიაღწევს უფრო მნიშვნელოვან შედეგებს თავის საქმიანობაში და წარმატებით გაართმევს თავს დასახულ ამოცანებს“, - დაწერა ჩეჩნეთის პარლამენტის სპიკერმა მაგომედ დაუდოვმა „ინსტაგრამზე“ და აიშათს თავისი ძმისშვილი უწოდა.

ერთი წლის წინ აიშათ კადიროვა ჩეჩნეთის კულტურის მინისტრის მოადგილედ დაინიშნა. ხოჯ-ბაუადი დააევმა, რომელმაც მინისტრის პოსტი კადიროვას დაუთმო, თქვა, რომ  აიშათის გამოჩენის შემდეგ სამინისტროს მუშაობა უფრო დინამიური გახდა.

სახელმწიფო სამსახურში მისვლამდე, კადიროვა ისლამური მოდის სახლის Firdaws-ის ხელმძღვანელი იყო. ჩეჩნური ბრენდი 2009 წელს ჩეჩნეთის ლიდერის ცოლმა მედნი კადიროვამ დააფუძნა, შემდეგ კი კომპანიის მმართველობა მის ქალიშვილს გადაეცა.

აიშათი რამზან კადიროვის შვილებს შორის, პირველია, რომელმაც მაღალი თანამდებობა დაიკავა.

2020 წელს აიშათი დედასა და ერთ-ერთ დასთან ერთად შეერთებული შტატების სანქციათა სიაში მოხვდა. სამივე მათგანს აშშ-ში შესვლა ეკრძალება.

 „სახელმწიფო დეპარატამენტი ფლობს სარწმუნო ინფორმაციას იმის შესახებ, რომ კადიროვს ეკისრება პასუხისმგებლობა 10 წლის განმავლობაში ადამიანის უფლებათა უხეშ დარვევებზე, მათ შორის წამებასა და მკვლელობებზე“, - ნათქვამი იყო აშშ-ის ყოფილი სახელმწიფო მდივნის მაიკ პომპეოს განცხადებაში.